ఐఎన్ఎస్ విక్రాంత్‌పై రాఫెల్-ఎం పరీక్షలు.. భారత నావికాదళానికి మరింత బలం

భారత నావికాదళం రాఫెల్-ఎం (మెరైన్) యుద్ధ విమానాన్ని గోవాలో ఐఎన్ఎస్ విక్రాంత్ యుద్ధనౌక నుంచి పరీక్షించింది. విమానం నౌకపై నుంచి ఎలా టేకాఫ్ అవుతుంది, తిరిగి ఎలా ల్యాండ్ అవుతుంది అనే అంశాలను అధికారులు పరిశీలించారు. విమానవాహక నౌక అయిన ఐఎన్ఎస్ విక్రాంత్‌పై రాఫెల్-ఎం విమానాల నిర్వహణ సామర్థ్యాన్ని అంచనా వేయడంలో ఈ పరీక్షలు కీలకంగా మారాయి. ఫ్రాన్స్‌కు చెందిన డస్సాల్ట్ ఏవియేషన్ సంస్థ ఈ యుద్ధ విమానాలను తయారు చేస్తోంది. భారత నావికాదళం కోసం 26 రాఫెల్-ఎం విమానాలను కొనుగోలు చేసేందుకు భారత్ ఫ్రాన్స్‌తో సుమారు రూ.63,000 కోట్ల ఒప్పందం కుదుర్చుకుంది. వీటిలో 22 సింగిల్‌ సీటర్‌ విమానాలు, నాలుగు ట్విన్‌ సీటర్‌ విమానాలు ఉన్నాయి.

రాఫెల్-ఎం యుద్ధ విమానాలు గంటకు అత్యధిక వేగంతో ప్రయాణించగలవు. ఇవి మ్యాక్‌ 1.8 గరిష్ఠ వేగాన్ని అందుకోగలవు. సుమారు 15.3 మీటర్ల పొడవు కలిగిన ఈ విమానాల్లో ఎం88 టర్బోఫ్యాన్ ఇంజిన్లు ఉంటాయి. గగనతలంలో శత్రు విమానాలను ఎదుర్కొనే క్షిపణులను ప్రయోగించడంతో పాటు, గాలిలోనే ఇంధనం నింపుకునే సామర్థ్యం వీటి ప్రత్యేకత. ఒప్పందం ప్రకారం, ఫ్రాన్స్ ఈ విమానాలను 2028 చివరి నుంచి 2029 ప్రారంభం మధ్య భారత్‌కు అందించడం ప్రారంభించే అవకాశం ఉంది. మొత్తం విమానాల సరఫరా 2030లోపు పూర్తికావాల్సి ఉంది. ఇవి నావికాదళంలో చేరితే భారత సముద్ర రక్షణ సామర్థ్యం మరింత బలోపేతం కానుంది.