విమానంలో అభిమానికి ఆటోగ్రాఫ్.. రాహుల్ ద్రవిడ్ సింప్లిసిటీకి ఫిదా!

భారత క్రికెట్ జట్టుకు ఆటగాడిగా ఎన్నో చిరస్మరణీయ విజయాలను అందించిన రాహుల్ ద్రవిడ్.. ప్రధాన కోచ్‌గా కూడా తనదైన ముద్ర వేశారు. మైదానంలోనే కాకుండా, వ్యక్తిగత జీవితంలోనూ ఎంతో నిరాడంబరంగా ఉండే ఆయన తాజాగా ఓ అభిమానితో వ్యవహరించిన తీరు నెటిజన్ల మనసు గెలుచుకుంది. తన సోదరీమణులతో కలిసి ఇండిగో విమానంలో ప్రయాణిస్తున్న ఓ యువకుడికి అనుకోకుండా రాహుల్ ద్రవిడ్ పక్కన కూర్చునే అవకాశం లభించింది. దీంతో ఎంతో సంతోషించిన ఆ యువకుడు వెంటనే ఆయన వద్దకు వెళ్లి ఆటోగ్రాఫ్ కోరాడు. ద్రవిడ్ కూడా ఎలాంటి అసహనం చూపకుండా చిరునవ్వుతో ఆటోగ్రాఫ్ ఇచ్చారు.

ఈ మధురమైన అనుభవాన్ని ఆ యువకుడు తన సోషల్ మీడియా ఖాతాలో వీడియో రూపంలో పంచుకున్నాడు. ‘ఇందిరానగర్ గూండా చాలా స్వీట్’ అంటూ క్యాప్షన్ జత చేశాడు. విమానం దిగిన తర్వాత విమానాశ్రయం నుంచి బయటకు వెళ్లేందుకు ద్రవిడ్ బస్సు ఎక్కిన దృశ్యాలను కూడా ఆ వీడియోలో చేర్చాడు. ప్రస్తుతం ఈ వీడియో వైరల్‌గా మారడంతో అభిమానులు ద్రవిడ్ నిరాడంబరతను ప్రశంసిస్తున్నారు. గతంలో ఓ వాణిజ్య ప్రకటనలో రాహుల్ ద్రవిడ్‌ను ‘ఇందిరానగర్ గూండా’గా చూపించడం అప్పట్లో విశేషంగా చర్చనీయాంశమైంది. ఇప్పుడు అదే పేరుతో అభిమాని చేసిన వ్యాఖ్య మరోసారి అందరి దృష్టిని ఆకర్షిస్తోంది.