తెలంగాణ సంస్కృతి వైభవానికి ప్రతీక సద్దుల బతుకమ్మ

తెలంగాణ సంస్కృతి, సంప్రదాయాలకు ప్రతీకగా నిలిచే సద్దుల బతుకమ్మ పండుగ సందర్భంగా ముఖ్యమంత్రి ఎ. రేవంత్ రెడ్డి రాష్ట్ర ప్రజలకు హృదయపూర్వక శుభాకాంక్షలు తెలిపారు. ప్రకృతిని ఆరాధించే సంప్రదాయానికి, మహిళల ఐక్యతకు నిదర్శనంగా నిలిచే బతుకమ్మ పండుగ తెలంగాణ ప్రజల జీవనశైలిని, సాంస్కృతిక వైభవాన్ని ప్రతిబింబిస్తుందని పేర్కొన్నారు. తొమ్మిది రోజుల పాటు రంగురంగుల పూలతో బతుకమ్మలను పేర్చి, గౌరమ్మను భక్తిశ్రద్ధలతో పూజిస్తూ, ఆటపాటలతో జరుపుకునే ఈ పూల పండుగ రాష్ట్ర ప్రత్యేకతను చాటిచెబుతుందని తెలిపారు.

బతుకమ్మ కేవలం పూల పండుగ మాత్రమే కాదని, మహిళల ఐక్యతకు, ఆడబిడ్డల ఆత్మగౌరవానికి, ప్రకృతి ప్రేమకు, సాంస్కృతిక వారసత్వ పరిరక్షణకు ప్రతీక అని ముఖ్యమంత్రి పేర్కొన్నారు. పూర్వీకుల నుంచి అందిన ఈ అపురూపమైన సంప్రదాయాన్ని భావితరాలకు అందించడం ప్రతి ఒక్కరి బాధ్యతని గుర్తుచేశారు. ఈ సద్దుల బతుకమ్మ ప్రతి ఇంటా సంతోషాలను నింపాలని, కుటుంబాల్లో సిరిసంపదలు, సుఖశాంతులు వెల్లివిరియాలని, తెలంగాణ ఆడపడుచుల జీవితాల్లో ఆనందం, ఆత్మవిశ్వాసం పెంపొందాలని ఆకాంక్షించారు. తెలంగాణ సంస్కృతి వైభవం ప్రపంచవ్యాప్తంగా విస్తరించాలని అభిలషించారు.