లింక్డిన్‌లోకి విరాట్ కోహ్లీకి సత్య నాదెళ్ల స్వాగతం..

టీమిండియా స్టార్ క్రికెటర్‌ విరాట్ కోహ్లీ లింక్డిన్‌లో తొలి పోస్టు చేయడం ఆసక్తికరంగా మారింది. దీనిపై మైక్రోసాఫ్ట్‌ సీఈవో సత్య నాదెళ్ల స్పందించారు. ‘‘ఇప్పుడు నా ఫీడ్‌ మరింత ఆసక్తికరంగా మారింది. విరాట్‌.. లింక్డిన్‌లోకి స్వాగతం. One8Worldతో మీ కొత్త వ్యాపార ప్రయాణానికి శుభాకాంక్షలు’’ అంటూ ఆయన పోస్టు చేశారు. కోహ్లీ లింక్డిన్‌లోకి రావడంతో క్రీడలు, వ్యాపార రంగాలకు సంబంధించిన అంశాలపై చర్చ మొదలైంది. కోహ్లీ తన తొలి పోస్టులో భారత క్రీడారంగ భవిష్యత్తుపై తన అభిప్రాయాలను పంచుకున్నారు.

భారత్‌లో ప్రతి క్రీడను ప్రజలు ఆదరించి, ఆస్వాదించే రోజులు రావాలని తాను కోరుకుంటున్నట్లు కోహ్లీ తెలిపారు. ప్రపంచ స్థాయి క్రీడాకారులను తయారు చేయడంతో పాటు అంతర్జాతీయ స్థాయిలో గుర్తింపు పొందే బ్రాండ్లను సృష్టించే సామర్థ్యం భారత యువతకు ఉందని పేర్కొన్నారు. ప్రపంచ క్రీడారంగంలో భారత్‌ కేవలం పాల్గొనే స్థాయిలోనే కాకుండా, అంతర్జాతీయ టోర్నీల భవిష్యత్తును తీర్చిదిద్దే స్థాయికి ఎదగాలని ఆకాంక్షించారు. తన కెరీర్‌ అనుభవాల నుంచి ఎన్నో విషయాలు నేర్చుకున్నానని, హద్దులను అధిగమిస్తూ ఉన్నత ప్రమాణాలతో కొత్త ప్రయత్నాలు చేసినప్పుడే అభివృద్ధి సాధ్యమవుతుందని కోహ్లీ అభిప్రాయపడ్డారు.