ఎల్‌నినో నేపథ్యంలో వీబీ-జీ రామ్ జీ పనులపై మంత్రి సీతక్క సమీక్ష

ఎల్‌నినో పరిస్థితుల నేపథ్యంలో వీబీ-జీ రామ్ జీ ఉపాధి పనులపై తెలంగాణ మంత్రి సీతక్క ఉన్నతస్థాయి సమీక్ష నిర్వహించారు. ఈ సమావేశంలో పంచాయతీరాజ్ స్పెషల్ చీఫ్ సెక్రటరీ దాన కిషోర్, కమిషనర్ దివ్య దేవరాజన్, సీనియర్ ఇంజినీరింగ్ అధికారులు పాల్గొన్నారు. డీఆర్డీఓలు, ఈఈలు, డీఈలు, ఎంపీడీవోలు వీడియో కాన్ఫరెన్స్ ద్వారా సమావేశానికి హాజరయ్యారు. ఉపాధి పనులపై కేవలం సమాధానాలు చెప్పడం కాకుండా క్షేత్రస్థాయిలో పురోగతి చూపించాలని సీతక్క అధికారులకు స్పష్టం చేశారు. ఇంకా పనులు ప్రారంభించని అధికారులపై అసంతృప్తి వ్యక్తం చేశారు. అర్హులైన వారికి, ముఖ్యంగా గిరిజనులకు జాబ్ కార్డులు జారీ చేయడంలో జాప్యం చేస్తే కఠిన చర్యలు తీసుకుంటామని హెచ్చరించారు. ఎల్‌నినో పరిస్థితులను దృష్టిలో పెట్టుకుని ఎనిమిది నెలల కార్యాచరణ రూపొందించాలని, అక్టోబర్ 29 లేదా 30 నాటికి మండలస్థాయి కమిటీల ద్వారా ప్రణాళికలు పూర్తి చేసి నవంబర్ 1 నుంచి పనులు ప్రారంభించేందుకు సిద్ధం కావాలని ఆదేశించారు.

గ్రామాభివృద్ధి, ఉపాధి కల్పనతో పాటు శాశ్వత ఆస్తుల నిర్మాణానికి ప్రాధాన్యం ఇవ్వాలని మంత్రి సూచించారు. కమ్యూనిటీ హాళ్లు, పాఠశాలల ప్రహరీ గోడలు, గ్రామ సంఘాల భవనాలు, సౌర విద్యుత్ సంబంధిత పనులు, పశుగ్రాసం, పశువుల నీటి తొట్టెల నిర్మాణం వంటి పనులను గుర్తించాలని చెప్పారు. కాలువల మరమ్మతులతో నీటి వృథాను అరికట్టాలని, పరిస్థితులకు అనుగుణంగా ఆరుతడి పంటలను ప్రోత్సహించాలని సూచించారు. పనుల ప్రణాళిక, అమలులో సర్పంచులు, పంచాయతీ కార్యదర్శులు, ఫీల్డ్ అసిస్టెంట్లను భాగస్వాములను చేసి కూలీల భాగస్వామ్యాన్ని పెంచాలని తెలిపారు. అన్ని పనులను ఒకేసారి పూర్తి చేయకుండా ఏడాది పొడవునా ఉపాధి లభించేలా దశలవారీగా అమలు చేయాలని ఆదేశించారు. గిరిజన ప్రాంతాల ప్రత్యేక అవసరాలను పరిగణనలోకి తీసుకుని ఐటీడీఏ పరిధిలో నిర్దేశించిన ఏడు శాతం వర్క్ షేర్‌కు అనుగుణంగా పనులు గుర్తించాలని చెప్పారు. అర్హులైన గిరిజనులు ఒక్కసారి దరఖాస్తు చేసుకున్నా అధికారులు స్పందించాలని, వారిని కార్యాలయాల చుట్టూ తిప్పకూడదని స్పష్టం చేశారు.