సుప్రీంకోర్టులో రఘురామకృష్ణరాజుకు ఎదురుదెబ్బ...ఎఫ్‌ఐఆర్ రద్దుకు నిరాకరణ

ఆంధ్రప్రదేశ్ అసెంబ్లీ డిప్యూటీ స్పీకర్ రఘురామకృష్ణరాజుకు సుప్రీంకోర్టులో ఎదురుదెబ్బ తగిలింది. ఇండ్ భారత్ పవర్ జెన్‌కామ్‌కు సంబంధించిన బ్యాంకు మోసం కేసులో నమోదైన ఎఫ్‌ఐఆర్ ను రద్దు చేయాలంటూ దాఖలైన పిటిషన్లను సుప్రీంకోర్టు కొట్టివేసింది. ఈ కేసులో కంపెనీ డైరెక్టర్లు దాఖలు చేసిన క్వాష్ పిటిషన్లను కూడా ధర్మాసనం తిరస్కరించింది. దర్యాప్తు ప్రక్రియలో తాము జోక్యం చేసుకోలేమని స్పష్టం చేసిన న్యాయస్థానం, కేసులో తదుపరి చర్యలు చట్టప్రకారం కొనసాగాలని సూచించింది.

ఇండ్ భారత్ పవర్ జెన్‌కామ్‌కు సంబంధించిన ఈ కేసులో రూ.237 కోట్ల మేర మోసం, నిధుల మళ్లింపు ఆరోపణలు ఉన్నాయి. ఈ వ్యవహారంపై సెంట్రల్ బ్యూరో ఆఫ్ ఇన్వెస్టిగేషన్ (CBI) దర్యాప్తు చేపడుతోంది. దర్యాప్తును పూర్తి చేసి 16 వారాల్లోగా ఛార్జ్‌షీట్ దాఖలు చేయాలని సుప్రీంకోర్టు ఆదేశించింది. ఎఫ్‌ఐఆర్ ను రద్దు చేయాలన్న అభ్యర్థనలను తిరస్కరించడంతో ఈ కేసులో దర్యాప్తు కొనసాగేందుకు మార్గం సుగమమైంది.