ఐపీఎస్‌ అంకితా శర్మకు షోకాజ్‌ నోటీసులు...

దసరా వేడుకల్లో ఆయుధ పూజ అనంతరం ఏకే-47తో కాల్పులు జరిపిన వీడియో వైరల్‌ కావడంతో ఛత్తీస్‌గఢ్‌కు చెందిన ఐపీఎస్‌ అధికారి, రాజ్‌నంద్‌గావ్‌ ఎస్పీ అంకితా శర్మకు పోలీసు శాఖ షోకాజ్‌ నోటీసులు జారీ చేసింది. అక్టోబర్‌ 20న పోలీస్‌ లైన్స్‌లో ఈ ఘటన జరిగినట్లు సమాచారం. వీడియోపై సోషల్‌ మీడియాలో భిన్నాభిప్రాయాలు వ్యక్తమయ్యాయి. కొందరు ఆమెకు మద్దతు తెలపగా, మరికొందరు ఆయుధాల వినియోగంలో భద్రతా నిబంధనలు పాటించలేదని విమర్శించారు. ఈ వ్యవహారం పోలీసు శాఖ ప్రతిష్ఠపై ప్రభావం చూపే అవకాశం ఉందని ఉన్నతాధికారులు ఆందోళన వ్యక్తం చేసినట్లు కథనాలు పేర్కొన్నాయి. భద్రతా ప్రమాణాలను ఎందుకు పాటించలేదో వివరణ ఇవ్వాలని అంకితా శర్మను ఆదేశించారు. ఆమె సమాధానాన్ని పరిశీలించిన తర్వాత తన అభిప్రాయాలను పోలీస్‌ ప్రధాన కార్యాలయానికి పంపుతానని రాజ్‌నంద్‌గావ్‌ రేంజ్‌ ఐజీ అజయ్‌ యాదవ్‌ తెలిపినట్లు సమాచారం.

ఈ ఘటనతో ఉత్సవాల సమయంలో ఆయుధాలతో కాల్పులు జరపడంపై చర్చ మొదలైంది. ఆయుధ పూజలో భాగంగా కాల్పులు జరపాల్సిన అవసరం లేదని రిటైర్డ్‌ ఐపీఎస్‌ అధికారి ఆర్‌.కే. విజ్‌ అభిప్రాయపడ్డారు. ఇలాంటి చర్యలు ప్రమాదాలకు దారితీయవచ్చని హెచ్చరించారు. మరోవైపు, ఛత్తీస్‌గఢ్‌లో ఆయుధ పూజ సందర్భంగా ఖాళీ తూటాలతో కాల్పులు జరపడం సంప్రదాయంలో భాగమని ఓ ఐపీఎస్‌ అధికారి పేర్కొన్నట్లు పీటీఐ తెలిపింది. అయితే, గాల్లోకి కాల్చిన తూటాలు తిరిగి కిందపడితే గాయాలయ్యే ప్రమాదం ఉందని ఆయన హెచ్చరించారు. మాజీ సైనికాధికారి కేజే ధిల్లాన్‌ కూడా ఆయుధాన్ని గురిపెట్టిన దిశ, వెనుక ప్రజలు ఉండటం వంటి అంశాలపై అభ్యంతరాలు వ్యక్తం చేశారు. అదనపు ఎస్పీ కీర్తన్‌ రాథోడ్‌ కాల్పులు జరిపినట్లు మరో వీడియో వెలుగులోకి వచ్చినట్లు సమాచారం. రాయ్‌పూర్‌, బిలాస్‌పూర్‌, రాయ్‌గఢ్‌, దుర్గ్‌, కబీర్‌ధామ్‌, బస్తర్‌ జిల్లాల్లోనూ ఇలాంటి వీడియోలు కనిపించడంతో ఉత్సవాల సమయంలో ఆయుధాల వినియోగం, భద్రతా నిబంధనల అమలుపై చర్చ కొనసాగుతోంది.