ఏపీ మద్యం టెండర్ల కేసులో కారుమూరి సునీల్‌పై సిట్ ప్రశ్నల వర్షం

ఆంధ్రప్రదేశ్‌లో మద్యం రవాణా టెండర్ల కేటాయింపుల్లో అక్రమాలు జరిగాయన్న ఆరోపణలకు సంబంధించి కారుమూరి సునీల్‌కుమార్‌ను సిట్ అధికారులు రెండో రోజు విచారించారు. హైదరాబాద్‌లోని చంచల్‌గూడ జైలులో ఉన్న ఆయనను ఏపీ సీఐడీ, ప్రత్యేక దర్యాప్తు బృందం (సిట్) అధికారులు సుమారు నాలుగు గంటలపాటు ప్రశ్నించారు. మద్యం రవాణా టెండర్ల కేటాయింపుల్లో నిబంధనలు ఉల్లంఘించారన్న ఆరోపణలపై అధికారులు వివరాలు సేకరించినట్లు సమాచారం. టెండర్ల ప్రక్రియలో కీలక నిర్ణయాలు ఎవరు తీసుకున్నారు? కేటాయింపుల వెనుక ఎవరెవరి పాత్ర ఉంది? అనే అంశాలపై విచారణ జరిపినట్లు తెలుస్తోంది.

అదేవిధంగా, టెండర్ల వ్యవహారంలో తెరవెనుక ఆర్థిక లావాదేవీలు జరిగాయన్న ఆరోపణలపైనా అధికారులు ప్రశ్నించినట్లు సమాచారం. ఈ వ్యవహారంలో ఎవరెవరికి ప్రయోజనాలు చేకూరాయి? నిర్ణయాల వెనుక ఎవరైనా ఉన్నారా? అనే కోణాల్లో దర్యాప్తు కొనసాగిస్తున్నారు. కారుమూరి సునీల్‌కుమార్‌ను రెండు రోజులపాటు సిట్ కస్టడీకి అప్పగించేందుకు విజయవాడ ఏసీబీ కోర్టు అనుమతించిన విషయం తెలిసిందే. ఈ కస్టడీలో భాగంగా అధికారులు ఆయన నుంచి మరిన్ని వివరాలు రాబట్టేందుకు ప్రయత్నిస్తున్నారు. అయితే, ఈ కేసులోని ఆరోపణలు దర్యాప్తులో ఉన్న అంశాలే.