ఎన్నికల విధుల్లో నిర్లక్ష్యం, పక్షపాత ఆరోపణలు.. పోలీసులపై చర్యలకు ఎస్‌ఈసీ ఆదేశాలు

ఎంపీటీసీ, జడ్పీటీసీ ఎన్నికల నామినేషన్ల ప్రక్రియలో నిర్లక్ష్యంగా వ్యవహరించడంతో పాటు పక్షపాత వైఖరి ప్రదర్శించారనే ఆరోపణలపై పల్నాడు, అన్నమయ్య జిల్లాలకు చెందిన పోలీసు అధికారులపై చర్యలు తీసుకోవాలని రాష్ట్ర ఎన్నికల కమిషనర్‌ అనిల్‌చంద్ర పునేఠా ఆదేశించారు. అన్నమయ్య జిల్లా ములకలచెరువు ఎంపీడీవో కార్యాలయంలో నామినేషన్లు దాఖలు చేయకుండా అడ్డుకున్నారనే ఆరోపణలపై ప్రత్యేక డిప్యూటీ కలెక్టర్‌ విచారణ జరిపి సీఐ కె. దస్తగిరి, ఎస్‌ఐ పి. రామకృష్ణలకు సంబంధించిన నివేదికను సమర్పించారు. ఈ నివేదికను పరిశీలించిన ఎస్‌ఈసీ, సంబంధిత అధికారులపై క్రమశిక్షణ చర్యలు తీసుకోవాలని కోరుతూ శనివారం కర్నూలు రేంజ్‌ డీఐజీ, అన్నమయ్య జిల్లా ఎస్పీకి లేఖ రాసింది. వారిని తక్షణమే ఎన్నికల విధులు, సాధారణ విధుల నుంచి రిలీవ్‌ చేయాలని కూడా ఆదేశించింది.

మాజీ మంత్రి విడదల రజని నివాసం వద్ద జరిగిన ఘటనపైనా రాష్ట్ర ఎన్నికల కమిషన్‌ తీవ్రంగా స్పందించింది. చిలకలూరిపేట రూరల్‌ ఎస్‌ఐ ప్రియాంక తనను తోసినట్లు విడదల రజనికి సంబంధించి మీడియాలో వార్తలు రావడంతో ఈ వ్యవహారంపై విచారణ జరిపి తగిన క్రమశిక్షణ చర్యలు తీసుకోవాలని పల్నాడు జిల్లా ఎస్పీని ఎస్‌ఈసీ ఆదేశించింది. ఎస్‌ఐ ప్రియాంకను కూడా తక్షణమే ఎన్నికల విధులు, సాధారణ విధుల నుంచి రిలీవ్‌ చేయాలని స్పష్టం చేసింది. ఎన్నికల ప్రక్రియలో పోలీసుల వ్యవహారశైలిపై వచ్చిన ఆరోపణలను ఎన్నికల సంఘం తీవ్రంగా పరిగణిస్తోందని ఈ ఆదేశాలు తెలియజేస్తున్నాయి.