పండుగ సాయన్నకు ఘన నివాళి.. ట్యాంక్‌బండ్‌పై విగ్రహాలు ఏర్పాటు చేస్తాం: రేవంత్‌రెడ్డి

తెలంగాణలో భూస్వాములు, జమిందార్లకు వ్యతిరేకంగా పోరాడి పేదలకు అండగా నిలిచిన పండుగ సాయన్న ముదిరాజ్‌ అందరికీ ఆదర్శమని ముఖ్యమంత్రి రేవంత్‌రెడ్డి అన్నారు. రవీంద్రభారతిలో నిర్వహించిన పండుగ సాయన్న జయంతి వేడుకల్లో పాల్గొన్న ఆయన.. సాయన్న పోరాటం ద్వారా ఎంతోమందికి స్ఫూర్తినిచ్చారని కొనియాడారు. దొరలు ఆక్రమించిన భూములను తన పోరాటంతో పేదలకు పంచిన గొప్ప వ్యక్తిగా ఆయనను అభివర్ణించారు. పండుగ సాయన్న జయంతి, వర్థంతి కార్యక్రమాలను అధికారికంగా నిర్వహిస్తామని ప్రకటించారు. ట్యాంక్‌బండ్‌పై దొడ్డి కొమురయ్యతో పాటు పండుగ సాయన్న విగ్రహాలను ఏర్పాటు చేస్తామని తెలిపారు. చరిత్రలో సాయన్నకు తగిన గుర్తింపు లభించాలని, ఆయన పోరాటాన్ని ఇప్పటికీ జానపద గీతాల రూపంలో స్మరించుకుంటున్నారని పేర్కొన్నారు.

ముదిరాజ్‌ సామాజికవర్గానికి న్యాయం చేయడమే తమ ప్రభుత్వ లక్ష్యమని సీఎం స్పష్టం చేశారు. ముదిరాజ్‌ యువతకు మరిన్ని అవకాశాలు కల్పిస్తామని, ఆ వర్గానికి చెందిన నాయకులకు కూడా రాజకీయంగా ప్రాధాన్యం కల్పిస్తామని చెప్పారు. ఏడాదిలోనే కులగణన పూర్తి చేసి దేశానికి ఆదర్శంగా నిలిచామని పేర్కొన్నారు. ముదిరాజ్‌లను బీసీ-డీ నుంచి బీసీ-ఏలోకి మార్చాలన్న డిమాండ్‌ తమ దృష్టిలో ఉందని తెలిపారు. ఎస్సీ వర్గీకరణను కూడా చేపట్టామని గుర్తుచేశారు. గత ప్రభుత్వాల సంక్షేమ పథకాలను మరింత విస్తరించామని, రాష్ట్రంలో 3.48 కోట్ల మంది పేదలకు సన్నబియ్యం పంపిణీ చేస్తున్నామని వెల్లడించారు. ప్రజలు తమ ప్రభుత్వానికి అండగా నిలవాలని, వారి సంక్షేమానికి కృషి చేస్తామని రేవంత్‌రెడ్డి అన్నారు.