విమాన టికెట్ల ధరల పెరుగుదలపై సుప్రీంకోర్టు కీలక వ్యాఖ్యలు

పండుగల సీజన్‌లో విమాన టికెట్ల ధరలు భారీగా పెరగకుండా నియంత్రించేందుకు రూపొందిస్తున్న నిబంధనలకు సంబంధించి సుప్రీంకోర్టులో విచారణ జరిగింది. ఈ అంశంపై దాఖలైన పిటిషన్‌ను విచారించిన న్యాయస్థానానికి సొలిసిటర్ జనరల్ (SG) కీలక వివరాలు వెల్లడించారు. విమాన టికెట్ల ధరల నియంత్రణకు సంబంధించిన నిబంధనలను ఖరారు చేసినట్లు, వాటికి పరిపాలనాపరమైన అనుమతి కూడా లభించినట్లు కోర్టుకు తెలిపారు. మరో రెండు వారాల్లో ఈ నిబంధనలను అధికారికంగా ప్రచురించనున్నట్లు వివరించారు.

ఈ నేపథ్యంలో నవంబర్ 16లోగా ప్రచురించిన నిబంధనలను కోర్టు ముందు ఉంచాలని సుప్రీంకోర్టు సూచించింది. పండుగల సమయంలో విమాన టికెట్ల ధరలు ఒక్కసారిగా పెరగడంపై న్యాయస్థానం కూడా స్పందించింది. తాము సైతం విమాన టికెట్ల ధరల పెరుగుదలతో ఇబ్బందులు ఎదుర్కొంటున్నామని వ్యాఖ్యానించింది. కొత్త నిబంధనలు అమల్లోకి వస్తే పండుగల వేళ విమాన ప్రయాణికులకు ఊరట లభిస్తుందా, ధరల పెరుగుదలను నియంత్రించడంలో అవి ఎంతవరకు ప్రభావం చూపుతాయన్నది ఆసక్తికరంగా మారింది.