ఎస్‌ఐఆర్‌పై పిటిషన్లు.. నేడు సుప్రీంకోర్టులో విచారణ

ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌) ప్రక్రియను సవాల్ చేస్తూ దాఖలైన పిటిషన్లపై సుప్రీంకోర్టు నేడు విచారణ చేపట్టనుంది. కాంగ్రెస్ అగ్రనేత రాహుల్ గాంధీ, ఎంఐఎం అధినేత అసదుద్దీన్ ఒవైసీతో పాటు ఇండియా కూటమికి చెందిన పలువురు నేతలు ఈ ప్రక్రియను సవాల్ చేస్తూ రిట్ పిటిషన్లు దాఖలు చేశారు. ఈ పిటిషన్లు నేటి విచారణ జాబితాలో ఉన్నట్లు సుప్రీంకోర్టు వెబ్‌సైట్‌లో కనిపిస్తోంది.

ఎస్‌ఐఆర్‌ ప్రక్రియ కారణంగా భారీ సంఖ్యలో అర్హులైన ఓటర్ల పేర్లు ఓటర్ల జాబితాల నుంచి తొలగిపోయాయని పిటిషనర్లు ఆరోపిస్తున్నారు. ఈ ప్రక్రియలో పారదర్శకత, అర్హులైన ఓటర్ల హక్కుల పరిరక్షణకు సంబంధించిన అంశాలను వారు న్యాయస్థానం దృష్టికి తీసుకెళ్లారు. ఈ పిటిషన్లపై సుప్రీంకోర్టు విచారణలో ఎలాంటి పరిణామాలు చోటుచేసుకుంటాయన్నది ఆసక్తికరంగా మారింది.