తెలంగాణలో విద్యుత్‌ సమస్యలపై బీజేపీ చీఫ్‌ రామచంద్రరావు విమర్శలు

బీజేపీ రాష్ట్ర అధ్యక్షుడు రామచంద్రరావు హైదరాబాద్‌లోని పార్టీ రాష్ట్ర కార్యాలయంలో నిర్వహించిన అబ్దుల్‌ కలాం జయంతి కార్యక్రమంలో పాల్గొన్నారు. ఈ సందర్భంగా ఆయన మాట్లాడుతూ.. సామాన్య కుటుంబంలో జన్మించిన అబ్దుల్‌ కలాం దేశ రక్షణ రంగానికి విశేష సేవలందించారని కొనియాడారు. ఆయనను దేశం ‘మిసైల్‌ మ్యాన్‌’గా గుర్తించిందని పేర్కొన్నారు. అయితే, కలాం సేవలను కాంగ్రెస్‌ పార్టీ సరిగా గుర్తించలేదని విమర్శించారు. కేంద్ర ప్రభుత్వం ఉద్యోగులకు బోనస్‌ ప్రకటించడంతో పాటు దివ్యాంగుల సంక్షేమానికి పలు వెసులుబాట్లు కల్పించిందని తెలిపారు.

తెలంగాణలో విద్యుత్‌ సరఫరా సమస్యలతో రైతులు ఇబ్బందులు పడుతున్నారని రామచంద్రరావు ఆరోపించారు. నాణ్యమైన, అంతరాయం లేని విద్యుత్‌ అందించేందుకు ప్రభుత్వం తక్షణ చర్యలు తీసుకోవాలని డిమాండ్‌ చేశారు. 22-ఏ నిషేధిత భూముల జాబితా అంశంలో అవకతవకలు, వివాదాలు చోటుచేసుకుంటున్నాయని ఆరోపించారు. ఓటు చోరీ ఆరోపణలపై స్పందిస్తూ రాహుల్‌ గాంధీ కుటుంబంపై విమర్శలు చేశారు. విదేశీ నిధులు, కొన్ని స్వచ్ఛంద సంస్థల పాత్రపై కూడా ఆరోపణలు చేసిన ఆయన, దేశాన్ని బలహీనపరిచే ప్రయత్నాలను ప్రజలు గమనిస్తున్నారని వ్యాఖ్యానించారు.