గ్లోబల్ సమ్మిట్ ఏర్పాట్లపై తెలంగాణ సీఎస్ సమీక్ష

డిసెంబర్ 7, 8, 9 తేదీల్లో నిర్వహించనున్న తెలంగాణ గ్లోబల్ సమ్మిట్ ఏర్పాట్లపై రాష్ట్ర ప్రభుత్వ ప్రధాన కార్యదర్శి సంజయ్ జాజు సచివాలయంలో సమీక్షా సమావేశం నిర్వహించారు. ఈ ప్రతిష్ఠాత్మక కార్యక్రమానికి పారిశ్రామిక రంగ ప్రముఖులు, అంతర్జాతీయ ప్రతినిధులు, వివిధ రంగాల నిపుణులను ఆహ్వానించే ప్రక్రియపై ప్రధానంగా చర్చించారు. సమ్మిట్‌కు ముందస్తు కార్యక్రమాలుగా హైదరాబాద్‌లో అక్టోబర్ 24న, న్యూఢిల్లీలో అక్టోబర్ 29న నిర్వహించనున్న సమావేశాలకు ఆహ్వానాల పంపిణీపై కూడా ఆయన సమీక్షించారు. ఈ రెండు కార్యక్రమాలకు ఆహ్వానాలు పంపించినట్లు అధికారులు సీఎస్‌కు వివరించారు.

ఏరోస్పేస్, అంతరిక్షం, రక్షణ రంగాలకు చెందిన కీలక భాగస్వాములు ఈ కార్యక్రమాల్లో పాల్గొనేలా చర్యలు తీసుకోవాలని సంజయ్ జాజు అధికారులను ఆదేశించారు. వివిధ దేశాల రాయబారులతో పాటు ఫిక్కీ (FICCI), అసోచామ్ (ASSOCHAM), సీఐఐ (CII) వంటి ప్రముఖ పారిశ్రామిక సంఘాల ప్రతినిధులను ఆహ్వానించాలని సూచించారు. సమ్మిట్ లక్ష్యాలకు అనుగుణంగా ప్రముఖ పారిశ్రామికవేత్తలు, నిపుణుల భాగస్వామ్యాన్ని నిర్ధారించేందుకు సమగ్ర ప్రణాళికతో ముందుకు సాగాలని స్పష్టం చేశారు. హైదరాబాద్, న్యూఢిల్లీలలో జరిగే కార్యక్రమాలు ఆశించిన ఫలితాలు సాధించేలా సంబంధిత శాఖలు, భాగస్వామ్య సంస్థల మధ్య సమన్వయం బలోపేతం చేయాలని పిలుపునిచ్చారు.