భోగాపురం ఎయిర్‌పోర్ట్‌కు గంటన్నరపైగా ప్రయాణం

భోగాపురం విమానాశ్రయాన్ని వచ్చే నెలలో ప్రారంభించేందుకు ప్రభుత్వం వేగంగా సన్నాహాలు చేస్తోంది. ప్రధాని నరేంద్ర మోదీ చేతుల మీదుగా ప్రారంభించేందుకు ప్రణాళికలు రూపొందిస్తున్నాయి. అయితే విశాఖపట్నం నగరంనుంచి భోగాపురం వరకు సుమారు 50 కిలోమీటర్ల ప్రయాణం అవసరం అవుతుంది. నగర ట్రాఫిక్ కారణంగా ఈ దూరం వెళ్లడానికి ప్రస్తుతం సుమారు 2 గంటల సమయం పడుతోంది. అధికారులు చేసిన అధ్యయనంలో మూడు నాలుగు మార్గాలు ఉన్నప్పటికీ ఏ మార్గంలో వెళ్లినా గంటన్నరకు పైగానే సమయం పడుతుందని తేలింది.

ప్రత్యామ్నాయ మార్గాలు ఉన్నప్పటికీ ట్రాఫిక్ సమస్యలు ప్రయాణికులను ఇబ్బందులకు గురిచేస్తున్నాయి. హనుమంతువాక, ఎండాడ, మధురవాడ, ఆనందపురం మార్గాల్లో వెళ్లితే 1.50 గంటల సమయం పడుతోంది. అనకాపల్లి నుంచి ఎన్‌హెచ్-16 బైపాస్‌ గుండా వెళ్లితే ట్రాఫిక్ తక్కువగా ఉండటంతో గంటన్నరలో చేరుకోవచ్చు. స్టీల్‌ప్లాంట్, గాజువాక, బీచ్ రోడ్, భీమిలి ప్రాంతాల నుంచి కూడా ప్రయాణ సమయం 1.35 నుంచి 1.40 గంటల మధ్యలోనే ఉంది. రద్దీ నియంత్రణకు వీఎంఆర్‌డీఏ ప్రతిపాదించిన రోడ్లలో కొన్ని మాత్రమే ప్రయోజనకరంగా ఉన్నాయని అధికారులు భావిస్తున్నారు.