భారత్‌ - చైనాకు ట్రంప్‌ సర్కార్‌ ఊరట

అమెరికా అధ్యక్షుడు డొనాల్డ్ ట్రంప్ రష్యా, ఇరాన్‌పై ఆంక్షలకు సంబంధించిన 2026 చట్టంలోని పలు నిబంధనల అమలుకు మినహాయింపులు ఇస్తూ కార్యనిర్వాహక ఉత్తర్వుపై సంతకం చేశారు. అక్టోబర్ 16న జారీ చేసిన ఈ ఉత్తర్వుతో రష్యా నుంచి ముడి చమురు, సహజ వాయువు కొనుగోలు చేసే దేశాల వస్తువులపై 100 శాతం వరకు సుంకాలు విధించే కొన్ని చర్యల నుంచి మినహాయింపు లభించే అవకాశం ఉంది. ఈ నిర్ణయం అమెరికా జాతీయ ప్రయోజనాలకు అనుగుణంగా ఉందని ట్రంప్ పేర్కొంటూ, అవసరమైన ధ్రువీకరణను కాంగ్రెస్‌కు సమర్పించారు.

రష్యా చమురును అధికంగా కొనుగోలు చేసే భారత్‌, చైనాకు ఈ నిర్ణయం కొంత ఊరటనిచ్చే అవకాశముంది. అమెరికా సుంకాల భయాలు తగ్గితే భారత ఎగుమతిదారులకు ఎదురయ్యే వాణిజ్యపరమైన ఒత్తిడి తగ్గవచ్చు. అయితే, రష్యాపై ఇప్పటికే అమల్లో ఉన్న అన్ని ఆంక్షలను ఈ ఉత్తర్వు తొలగించలేదు. గతంలో విధించిన ఆంక్షలు కొనసాగుతాయి. భవిష్యత్తులో అమెరికా తీసుకునే విధాన నిర్ణయాలు, అంతర్జాతీయ చమురు ధరలు, మిగిలిన వాణిజ్య పరిమితుల అమలుపైనే ఈ నిర్ణయం ప్రభావం ఆధారపడి ఉంటుంది.