ట్రంప్‌ వలస విధానాల ఎఫెక్ట్‌.. అమెరికాకు వెళ్లే భారతీయ విద్యార్థుల సంఖ్యలో భారీ పతనం

అమెరికా అధ్యక్షుడు డొనాల్డ్ ట్రంప్ అనుసరిస్తున్న కఠిన వలస విధానాల ప్రభావం భారతీయ విద్యార్థులపై పడుతున్నట్లు కనిపిస్తోంది. వలసదారులపై అరెస్టులు, బహిష్కరణలు, వీసా ఆంక్షలు కఠినతరం కావడంతో అమెరికాలో ఉన్నత విద్యను అభ్యసించాలనుకునే భారతీయుల సంఖ్య తగ్గుతోంది. గతేడాది ఆగస్టుతో పోలిస్తే ఈ ఏడాది అదే నెలలో ఎఫ్‌, ఎం కేటగిరీ విద్యార్థి వీసాలపై అమెరికాకు వెళ్లిన భారతీయ విద్యార్థుల సంఖ్య 39 శాతం తగ్గినట్లు నివేదికలు వెల్లడించాయి. ఫాల్‌ సెమిస్టర్‌కు ముందు సాధారణంగా విదేశీ విద్యార్థుల రాక ఎక్కువగా ఉండే ఆగస్టులోనే ఈ తగ్గుదల నమోదవడం గమనార్హం. అమెరికా వాణిజ్య శాఖకు చెందిన అంతర్జాతీయ వాణిజ్య పరిపాలన (ITA) గణాంకాల ప్రకారం, ఈ ఏడాది ఆగస్టులో 25,321 మంది భారతీయ విద్యార్థులు అమెరికాకు వెళ్లగా, గతేడాది ఇదే నెలలో ఆ సంఖ్య 41,540గా ఉంది.

ట్రంప్‌ రెండోసారి అధ్యక్ష బాధ్యతలు చేపట్టిన తర్వాత విద్యార్థుల రాక తగ్గుదల మరింత స్పష్టంగా కనిపిస్తోందని నివేదికలు పేర్కొంటున్నాయి. కఠినమైన వీసా నిబంధనలు, వీసాల తిరస్కరణపై ఆందోళనలు, చదువు పూర్తయ్యాక ఉద్యోగ అవకాశాలపై అనిశ్చితి, సోషల్‌ మీడియా ఖాతాల పరిశీలన, పెరుగుతున్న విద్యా ఖర్చులు ఇందుకు ప్రధాన కారణాలుగా విశ్లేషకులు భావిస్తున్నారు. అమెరికాలో ఉన్నత విద్యను అభ్యసించాలనే ప్రణాళికలను భారతీయ విద్యార్థులు మరోసారి సమీక్షించుకుంటున్నారని విద్యారంగ కన్సల్టెంట్లు చెబుతున్నారు. అయితే, ఈ తగ్గుదలకు వలస విధానాలే ఏకైక కారణమని నిర్ధారించలేం. వీసా విధానాలు, ఆర్థిక పరిస్థితులు, ఉపాధి అవకాశాలు వంటి అనేక అంశాలు విద్యార్థుల నిర్ణయాలను ప్రభావితం చేయవచ్చు.