ఆధార్ పుట్టిన తేదీ సవరణపై యూఐడీఏఐ కొత్త రూల్స్

ఆధార్‌లో పుట్టిన తేదీని సాధారణంగా ఒక్కసారి మాత్రమే మార్చుకునే అవకాశం ఉంటుంది. అయితే, కొన్ని ప్రత్యేక పరిస్థితుల్లో రెండోసారి లేదా అంతకంటే ఎక్కువసార్లు పుట్టిన తేదీని సవరించుకునేందుకు యూఐడీఏఐ అవకాశం కల్పిస్తోంది. ప్రస్తుతం పుట్టిన తేదీని ఆన్‌లైన్‌లో మార్చుకునే సదుపాయం లేదు. ఇందుకోసం ఆధార్‌ సేవా కేంద్రాన్ని సందర్శించి, అవసరమైన ధ్రువీకరణ పత్రాలను సమర్పించాలి.

రెండోసారి పుట్టిన తేదీని మార్చుకోవాల్సి వస్తే, గతంలో సమర్పించిన పత్రాలను బట్టి జనన ధ్రువీకరణ పత్రం, సవరించిన జనన ధ్రువీకరణ పత్రం, ప్రమాణ పత్రం వంటి పత్రాలను అందించాల్సి ఉంటుంది. ఆధార్‌ నమోదు లేదా సవరణ సమయంలో నిర్వాహకుడి పొరపాటు కారణంగా పుట్టిన తేదీ తప్పుగా నమోదైనట్లు నిర్ధారణ అయితే, గతంలో సమర్పించిన పత్రాల ఆధారంగా సవరణకు అవకాశం ఉంటుంది. కొన్ని సందర్భాల్లో స్వీయ ప్రకటన ద్వారా కూడా మార్పు చేసుకునే వెసులుబాటు ఉంటుంది. అయితే, తప్పుడు లేదా నకిలీ పత్రాలను సమర్పిస్తే యూఐడీఏఐ నిబంధనల ప్రకారం కఠిన చర్యలు తీసుకునే అవకాశం ఉంది.