బార్ల కేటాయింపులో వ్యాపారుల నుంచి అనూహ్య స్పందన

రాష్ట్రంలో కొత్త బార్ల కేటాయింపు ప్రక్రియ ముగిసింది. మొత్తం 41 బార్ల కోసం 8,770 దరఖాస్తులు వచ్చాయి. సగటున ఒక్కో బార్‌కు 214 దరఖాస్తులు అందాయి. ఒక్కో దరఖాస్తుకు రూ.లక్ష చొప్పున వసూలు చేయడంతో ప్రభుత్వానికి రూ.87.70 కోట్ల ఆదాయం సమకూరింది. శుక్రవారం అధికారులు లాటరీ పద్ధతిలో ఎంపిక ప్రక్రియ నిర్వహించి, విజేతలకు వెంటనే బార్‌ అనుమతి పత్రాలను అందజేశారు.

వీటిలో ‘క్యూర్‌’ పరిధిలోని 14 బార్లకు ఎక్సైజ్‌ శాఖ కమిషనర్‌ సి. హరికిరణ్‌ ఆధ్వర్యంలో డ్రా నిర్వహించారు. ఈ బార్ల కోసం 4,251 దరఖాస్తులు రావడంతో ఒక్కో బార్‌కు సగటున 303 మంది పోటీపడ్డారు. ఇతర జిల్లాల్లోని కార్పొరేషన్లు, మున్సిపాలిటీల పరిధిలో ఉన్న 27 బార్లకు ఆయా జిల్లాల కలెక్టర్లు డ్రా నిర్వహించారు. ఈ బార్ల కోసం 4,519 దరఖాస్తులు వచ్చాయి. ఒక్కో బార్‌కు సగటున 167 మంది పోటీపడ్డారు.