విరోష్‌ జంటపై తప్పుడు ప్రచారం..సైబర్ క్రైమ్ అధికారులకు ఫిర్యాదు చేసిన టీమ్

విజయ్ దేవరకొండ, రష్మిక మందన్న జంటను అభిమానులు ‘విరోష్‌’గా పిలుచుకుంటున్న సంగతి తెలిసిందే. ఈ జంటకు సంబంధించిన తప్పుడు, తప్పుదారి పట్టించే ప్రచారం ఆన్‌లైన్‌లో జరుగుతోందని ఆరోపిస్తూ, వారి తరఫున పనిచేస్తున్న టీమ్ హైదరాబాద్ సైబర్ క్రైమ్ అధికారులకు అధికారికంగా ఫిర్యాదు చేసింది. ఈ వ్యవహారంపై నిష్పక్షపాతంగా దర్యాప్తు జరపాలని కోరింది. సోషల్ మీడియా వేదికలపై కల్పిత కథనాలు, మార్పులు చేసిన స్క్రీన్‌షాట్‌లు, ఇతరుల పేర్లతో ఖాతాలు నిర్వహించడం, లక్ష్యంగా చేసుకుని వేధించడం వంటి అంశాలను ఫిర్యాదులో ప్రస్తావించినట్లు టీమ్ వెల్లడించింది. సంబంధిత లింకులు, ఇతర ఆధారాలను కూడా అధికారులకు సమర్పించినట్లు తెలిపింది. నిజమైన విమర్శలకు, ఉద్దేశపూర్వకంగా తప్పుడు సమాచారాన్ని వ్యాప్తి చేయడానికి మధ్య తేడా ఉందని టీమ్ పేర్కొంది. ప్రజలకు తమ అభిప్రాయాలను వ్యక్తం చేసే హక్కు ఉన్నప్పటికీ, కల్పిత లేదా మార్పులు చేసిన సమాచారాన్ని వాస్తవాలుగా ప్రచారం చేయడంపై అభ్యంతరం వ్యక్తం చేసింది.

తగిన ఆధారాలు లభించిన సందర్భాల్లో సమన్వయంతో నిర్వహిస్తున్నట్లు అనుమానిస్తున్న ప్రచారాలు, డబ్బులు చెల్లించి తప్పుడు సమాచారాన్ని వ్యాప్తి చేస్తున్నారనే ఆరోపణలపై కూడా దర్యాప్తు చేయాలని విరోష్‌ టీమ్ అధికారులను కోరింది. చట్టవిరుద్ధమైనవిగా అనుమానిస్తున్న కంటెంట్‌ను మొదటిసారి పోస్ట్ చేయడం, తిరిగి షేర్ చేయడం లేదా మరింత విస్తృతంగా ప్రచారం చేయడం వంటి ప్రతి అంశాన్ని విడివిడిగా పరిశీలించి, అవసరమైన చోట చట్టపరమైన చర్యలు తీసుకోవాలని విజ్ఞప్తి చేసింది. సోషల్ మీడియాలో ఏదైనా సమాచారాన్ని షేర్ చేసే ముందు దాని నిజానిజాలను నిర్ధారించుకోవాలని, ఊహాగానాలను వాస్తవాలుగా ప్రచారం చేయవద్దని వినియోగదారులకు సూచించింది. విజయ్ దేవరకొండ, రష్మిక మందన్న గౌరవప్రతిష్ఠలను కాపాడేందుకు చట్టబద్ధమైన మార్గాల్లో ముందుకు సాగుతామని టీమ్ స్పష్టం చేసింది. ఈ ఆరోపణలు, సమర్పించిన ఆధారాలపై సంబంధిత అధికారులు పరిశీలన జరపాల్సి ఉంది.