ప్రజల నమ్మకాన్ని వమ్ము చేయలేదు.. ఇచ్చిన మాట నిలబెట్టుకున్నాం: చంద్రబాబు

ప్రజల నమ్మకాన్ని తమ ప్రభుత్వం వమ్ము చేయలేదని ఆంధ్రప్రదేశ్ ముఖ్యమంత్రి చంద్రబాబు నాయుడు స్పష్టం చేశారు. ఎన్ని సవాళ్లు ఎదురైనా ప్రజలకు ఇచ్చిన హామీలను నెరవేరుస్తున్నామని, వారి జీవన ప్రమాణాలను మెరుగుపరచడమే ప్రభుత్వ ప్రధాన లక్ష్యమని తెలిపారు. ఉండవల్లిలో నిర్వహించిన మీడియా సమావేశంలో ఆయన మాట్లాడుతూ స్థానిక సంస్థల ఎన్నికల ప్రాధాన్యాన్ని వివరించారు. స్థానిక సంస్థలు బలోపేతమైనప్పుడే నిజమైన అధికార వికేంద్రీకరణ సాధ్యమవుతుందని పేర్కొన్నారు. గత ప్రభుత్వ పాలనలో రాష్ట్రం తన బ్రాండ్‌ను కోల్పోయిందని, ప్రస్తుతం రాష్ట్రాన్ని అభివృద్ధి పథంలోకి తీసుకువస్తున్నామని చెప్పారు. రాష్ట్రాభివృద్ధిని చూసి ఓర్వలేక వైకాపా నాయకులు రోడ్లను ధ్వంసం చేస్తున్నారని ఆరోపించారు. మెగా డీఎస్సీని అడ్డుకునేందుకు కోర్టులను ఆశ్రయించారని విమర్శించారు.

తమ ప్రభుత్వం రూ.లక్షన్నర కోట్లతో సంక్షేమ పథకాలను అమలు చేస్తోందని చంద్రబాబు తెలిపారు. సంక్షేమ క్యాలెండర్‌ ప్రకారం అర్హులకు నిర్ణీత సమయంలో ప్రయోజనాలు అందిస్తున్నామని చెప్పారు. దశాబ్దాలుగా పెండింగ్‌లో ఉన్న ప్రాజెక్టులను పూర్తి చేస్తున్నామని, ప్రభుత్వ సేవలపై ప్రజల అభిప్రాయాలను నిరంతరం సేకరించి లోపాలను సరిదిద్దుకుంటున్నామని వివరించారు. రాయలసీమను అభివృద్ధికి ఆదర్శంగా తీర్చిదిద్దుతామని, వెలిగొండ ప్రాజెక్టు మొదటి దశను పూర్తి చేశామని పేర్కొన్నారు. మార్కాపురాన్ని అన్ని రకాల పంటలు పండే ప్రాంతంగా అభివృద్ధి చేస్తామని హామీ ఇచ్చారు. గత ప్రభుత్వ హయాంలో స్థానిక సంస్థల నిధులను మళ్లించారని, 93 కేంద్ర పథకాలను నిలిపివేశారని ఆరోపించారు. కేంద్రంతో చర్చించి జల్‌జీవన్‌ మిషన్‌ను తిరిగి పునరుద్ధరించినట్లు చంద్రబాబు వెల్లడించారు.