మీ జన్మ నక్షత్రం ఏది? ఆ నక్షత్రం ప్రకారం ఏ గణపతిని పూజించాలో తెలుసా?

వేద జ్యోతిష్య సంప్రదాయం ప్రకారం 27 నక్షత్రాలు, 12 రాశులకు ప్రత్యేక ప్రాధాన్యం ఉంది. ప్రారంభించిన పనుల్లో విఘ్నాలు తొలగి, విజయాలు చేకూరాలని భక్తులు గణపతిని ఆరాధిస్తారు. గణేశ పురాణంలో గణపతి 32 స్వరూపాల ప్రస్తావన ఉంది. ఈ నేపథ్యంలో జన్మ నక్షత్రాన్ని బట్టి గణపతి ప్రత్యేక రూపాలను ఆరాధించడం శుభప్రదమని కొన్ని ఆధ్యాత్మిక సంప్రదాయాలు సూచిస్తున్నాయి. అశ్విని నక్షత్రం వారు ద్విముఖ గణపతిని, భరణి వారు సిద్ధ గణపతిని, కృత్తిక వారు ఉచ్చిష్ఠ గణపతిని, రోహిణి వారు విఘ్న గణపతిని, మృగశిర వారు క్షిప్ర గణపతిని, ఆరుద్ర వారు హేరంబ గణపతిని, పునర్వసు వారు లక్ష్మీ గణపతిని, పుష్యమి వారు మహా గణపతిని, ఆశ్లేష వారు విజయ గణపతిని, మఖ వారు నృత్య గణపతిని, పుబ్బ వారు ఊర్ధ్వ గణపతిని, ఉత్తర వారు ఏకాక్షర గణపతిని, హస్త వారు వరద గణపతిని, చిత్త వారు త్ర్యక్షర గణపతిని ఆరాధించాలని ఈ సంప్రదాయం పేర్కొంటోంది.

అదేవిధంగా స్వాతి నక్షత్రం వారు క్షిప్రసాద గణపతిని, విశాఖ వారు హరిద్ర గణపతిని, అనూరాధ వారు ఏకదంత గణపతిని, జ్యేష్ఠ వారు సృష్టి గణపతిని, మూల వారు ఉద్దాన గణపతిని, పూర్వాషాఢ వారు ఋణవిమోచన గణపతిని, ఉత్తరాషాఢ వారు ధుండి గణపతిని, శ్రవణం వారు ద్విముఖ గణపతిని, ధనిష్ఠ వారు త్రిముఖ గణపతిని, శతభిషం వారు సింహ గణపతిని, పూర్వాభాద్ర వారు యోగ గణపతిని, ఉత్తరాభాద్ర వారు దుర్గా గణపతిని, రేవతి వారు సంకటహర గణపతిని పూజించడం శుభప్రదమని పేర్కొంటున్నారు. ఆయా గణపతి స్వరూపాలు భక్తులకు ధైర్యం, జ్ఞానం, కార్యసిద్ధి, మనశ్శాంతి కలిగిస్తాయని ఆధ్యాత్మిక విశ్వాసం. అయితే నక్షత్రాల ఆధారంగా నిర్దిష్ట గణపతి రూపాన్ని ఆరాధించాలనే ఈ జాబితా అన్ని జ్యోతిష్య సంప్రదాయాల్లో ఒకే విధంగా ఉండకపోవచ్చు. భక్తులు తమ కుటుంబ ఆచారాలు, గురువుల సూచనలకు అనుగుణంగా పూజలు చేసుకోవచ్చు.