అప్పీల్‌కు అవకాశం ఉండగా రిట్ పిటిషన్ ఎందుకు? - జస్టిస్ సుబ్రమోణియం ప్రసాద్

సౌరవ్ దాస్‌, ఆశుతోష్‌ రంకా దాఖలు చేసిన పిటిషన్‌పై విచారణ సందర్భంగా జస్టిస్‌ సుబ్రమోనియం ప్రసాద్‌ కీలక ప్రశ్నలు లేవనెత్తారు. చట్టంలో ప్రత్యామ్నాయ పరిష్కార మార్గాలు అందుబాటులో ఉన్నప్పుడు నేరుగా హైకోర్టును ఎందుకు ఆశ్రయించారని పిటిషనర్లను ప్రశ్నించారు. పూచీకత్తుల తిరస్కరణకు సంబంధించి భారతీయ నాగరిక్‌ సురక్షా సంహిత (బీఎన్‌ఎస్ఎస్‌) సెక్షన్‌ 414 కింద అప్పీల్‌ చేసుకునే అవకాశం ఉందని న్యాయమూర్తి గుర్తుచేశారు. అటువంటి చట్టపరమైన మార్గం ఉన్నప్పటికీ, రాజ్యాంగంలోని ఆర్టికల్‌ 226 కింద రిట్‌ పిటిషన్‌ దాఖలు చేయడంపై అభ్యంతరం వ్యక్తం చేశారు. అందుబాటులో ఉన్న చట్టపరమైన పరిష్కారాన్ని ముందుగా వినియోగించుకోకుండా నేరుగా రిట్‌ పిటిషన్‌ దాఖలు చేయడం సముచితమేనా అనే అంశంపై కోర్టు ప్రశ్నలు సంధించింది.

గతంలో ఇచ్చిన బాండ్లను ఇద్దరు నేతలు ఉల్లంఘించారనే ఆరోపణను కూడా న్యాయమూర్తి ప్రస్తావించారు. శాంతిభద్రతలకు విఘాతం కలిగించబోమని గతంలో హామీ ఇచ్చినప్పటికీ, మరోసారి నిరోధక చర్యలను ఎదుర్కొంటున్న నేపథ్యంలో ఎగ్జిక్యూటివ్‌ మేజిస్ట్రేట్‌ (ఎస్ఈఎం) కఠినంగా వ్యవహరించి ఉండవచ్చని అభిప్రాయపడ్డారు. కోర్టు లేవనెత్తిన సాంకేతిక, చట్టపరమైన అభ్యంతరాల నేపథ్యంలో సౌరవ్‌ దాస్‌, ఆశుతోష్‌ రంకా తమ తరఫున దాఖలైన పిటిషన్‌ను స్వచ్ఛందంగా వెనక్కి తీసుకున్నారు. నిరోధక చర్యలు లేదా సంబంధిత ఉత్తర్వులను సవాలు చేసేటప్పుడు చట్టం సూచించిన ప్రక్రియను అనుసరించడం ఎంత ముఖ్యమో ఈ పరిణామం తెలియజేస్తోంది.