ఈపీఎఫ్‌వో పెన్షనర్లకు భారీ ఊరట లభించేనా?

ఉద్యోగుల భవిష్య నిధి సంస్థ (ఈపీఎఫ్‌వో) పెన్షనర్లకు చెల్లించే కనీస నెలవారీ పెన్షన్ పెంపు అంశంపై నవంబర్ 19న కీలక చర్చ జరిగే అవకాశం ఉంది. గుజరాత్‌లోని గిర్‌లో జరగనున్న ఈపీఎఫ్‌వో 240వ బోర్డు సమావేశంలో ఈ ప్రతిపాదన చర్చకు వచ్చే అవకాశముందని సంస్థ వర్గాల నుంచి అనధికారిక సమాచారం వెలువడింది. అయితే, సమావేశం అజెండాలో ఈ అంశం ఉన్నట్లు అధికారిక ప్రకటన వెలువడలేదు. కేంద్ర ప్రభుత్వం 2014 సెప్టెంబర్ నుంచి కనీస నెలవారీ పెన్షన్‌ను రూ.1,000గా అమలు చేస్తోంది. ప్రస్తుత జీవన వ్యయాలకు ఈ మొత్తం సరిపోవడం లేదని పేర్కొంటూ కనీస పెన్షన్‌ను రూ.7,500కు పెంచడంతోపాటు కరువు భత్యాన్ని కూడా వర్తింపజేయాలని రిటైర్డు ఉద్యోగుల సంఘాలు, కార్మిక సంఘాలు చాలాకాలంగా డిమాండ్ చేస్తున్నాయి. అయితే, నెలవారీ పెన్షన్ పెంపు వల్ల ఆర్థిక భారం పెరుగుతుందని కేంద్రం పేర్కొంటోంది.

ఇటీవల ఈపీఎఫ్‌వో తప్పనిసరి పరిధికి సంబంధించిన వేతన పరిమితిని రూ.15,000 నుంచి రూ.25,000కు పెంచినట్లు వచ్చిన సమాచారంతో కనీస పెన్షన్ పెంపు అంశానికి మరింత ప్రాధాన్యం ఏర్పడింది. మరోవైపు, అధిక వేతనం ఆధారంగా పెన్షన్ పొందేందుకు ఉమ్మడి ఆప్షన్ సమర్పించిన ఆరుగురు రిటైర్డు ఉద్యోగులకు బాంబే హైకోర్టులో ఊరట లభించినట్లు సమాచారం. మినహాయింపు పొందిన సంస్థల భవిష్య నిధి ట్రస్టుల నిబంధనలను కారణంగా చూపుతూ వారి దరఖాస్తులను ఈపీఎఫ్‌వో తిరస్కరించడాన్ని కోర్టు తప్పుబట్టింది. యజమాని చందాపై ట్రస్టు నిబంధనల్లో గరిష్ఠ పరిమితి ఉన్నా లేదా అధిక పెన్షన్ కోసం చందా చెల్లింపుపై స్పష్టమైన నిబంధన లేకపోయినా, ఆ కారణాలతోనే ఉద్యోగుల దరఖాస్తులను తిరస్కరించరాదని స్పష్టం చేసినట్లు పేర్కొనబడింది. కనీస పెన్షన్ పెంపుపై అధికారిక ప్రకటన వెలువడాల్సి ఉంది.