నదిని కాపాడాలన్న యువకుడి ప్రయత్నానికి ఊహించని షాక్‌!

మధ్యప్రదేశ్‌లోని రాజ్‌గఢ్‌ జిల్లాకు చెందిన 20 ఏళ్ల విద్యార్థి సురేంద్ర సింగ్‌ చౌదరి, సోషల్‌ మీడియాలో ‘బిట్టూ తబాహీ’ పేరుతో గుర్తింపు పొందాడు. ఒంటరిగా నెలల తరబడి శ్రమించి ఓ నదిని, దాని పరిసరాలను శుభ్రం చేశాడు. అయితే, కొన్ని వారాలకే నది ఒడ్డున ప్లాస్టిక్‌ సంచులు, ఇతర వ్యర్థాలు పేరుకుపోవడంతో అతడు నిరాశకు గురయ్యాడు. ప్రజలు నదిలో చెత్త వేయకుండా ఉండేందుకు, నది ఒడ్డున ఉన్న ఓ చెట్టు కింద రెండు పెద్ద డస్ట్‌బిన్‌లను ఏర్పాటు చేశాడు. వాటిలో చెత్త వేయడం ద్వారా నది పరిసరాలను పరిశుభ్రంగా ఉంచవచ్చని ఆశించాడు.

కానీ, కొంత సమయం తర్వాత అక్కడికి తిరిగి వెళ్లి చూడగా, తాను ఏర్పాటు చేసిన రెండు డస్ట్‌బిన్‌లలో ఒకటి కనిపించలేదు. దీంతో ఈ ఘటన సోషల్‌ మీడియాలో చర్చనీయాంశంగా మారింది. నది పరిసరాలను శుభ్రంగా ఉంచేందుకు ఓ యువకుడు చేస్తున్న ప్రయత్నాలను కొందరు ప్రశంసిస్తుండగా, డస్ట్‌బిన్‌ కనిపించకుండా పోవడంపై పలువురు అసహనం వ్యక్తం చేస్తున్నారు. పర్యావరణ పరిరక్షణలో ప్రభుత్వాలతో పాటు ప్రజల భాగస్వామ్యం కూడా ముఖ్యమని ఈ ఘటన గుర్తుచేస్తోంది. అయితే, డస్ట్‌బిన్‌ ఎలా కనిపించకుండా పోయిందనే విషయం స్వతంత్రంగా నిర్ధారణ కాలేదు.