యువత ఆలోచనలే రేపటి విప్లవాలకు పునాది - శ్రీధర్ బాబు

రాష్ట్రంలో లెదర్‌ పరిశ్రమను బలోపేతం చేయడంతో పాటు, ఔత్సాహిక ఎస్సీ పారిశ్రామికవేత్తలను ప్రోత్సహించేందుకు తెలంగాణ ప్రభుత్వం కొత్త చర్యలు చేపడుతోంది. ఇందులో భాగంగా గచ్చిబౌలిలో ప్రత్యేకంగా కామన్‌ ఫెసిలిటీ సెంటర్‌ (సీఎఫ్‌సీ)ను ఏర్పాటు చేయనున్నట్లు ఐటీ, పరిశ్రమల శాఖ మంత్రి దుద్దిళ్ల శ్రీధర్‌ బాబు తెలిపారు. సుమారు మూడున్నర ఎకరాల్లో హబ్‌ అండ్‌ స్పోక్‌ విధానంలో అభివృద్ధి చేయనున్న ఈ కేంద్రం ద్వారా రాష్ట్రంలోని లెదర్‌ ఆర్టిజన్ల ఉత్పత్తులకు అదనపు విలువను జోడించడంతో పాటు, వారికి మెరుగైన సదుపాయాలు కల్పించనున్నారు. కరీంనగర్‌ జిల్లా చొప్పదండి మండలం రుక్మాపూర్‌లో అంతర్జాతీయ ప్రమాణాలకు అనుగుణంగా పర్యావరణహిత చర్మశుద్ధి కర్మాగారాలను ఏర్పాటు చేసి సుమారు వెయ్యి మందికి ఉపాధి కల్పించేలా చర్యలు తీసుకుంటున్నట్లు మంత్రి వెల్లడించారు. సచివాలయంలో తెలంగాణ లెదర్‌ ఇండస్ట్రీస్‌ ప్రమోషన్‌ కార్పొరేషన్‌ ఉన్నతాధికారులతో నిర్వహించిన సమీక్షలో పరిశ్రమ అభివృద్ధి, ఆర్టిజన్ల ప్రోత్సాహం, ఎస్సీ యువతను పారిశ్రామికవేత్తలుగా తీర్చిదిద్దే అంశాలపై చర్చించారు. అలాగే, మైక్రో అండ్‌ స్మాల్‌ ఎంటర్‌ప్రైజెస్‌ క్లస్టర్‌ డెవలప్‌మెంట్‌ ప్రోగ్రామ్‌ కింద హుజూరాబాద్‌ నియోజకవర్గంలోని జమ్మికుంట, ఆర్మూర్‌లో ప్లగ్‌ అండ్‌ ప్లే విధానంలో ఫ్లాటెడ్‌ ఫ్యాక్టరీ కాంప్లెక్స్‌లను అందుబాటులోకి తీసుకురావాలని ప్రభుత్వం యోచిస్తోంది.

మరోవైపు, భవిష్యత్తును తీర్చిదిద్దడంలో జెన్‌ జీ కీలక పాత్ర పోషించనుందని మంత్రి శ్రీధర్‌ బాబు అన్నారు. జూబ్లీహిల్స్‌లోని ఓ కన్వెన్షన్‌ సెంటర్‌లో నిర్వహించిన ‘డెవ్‌ ఫెస్ట్‌ 2026’లో ఆయన పాల్గొని యువతను ఉద్దేశించి మాట్లాడారు. ఈ కార్యక్రమానికి సుమారు 3,500 మంది ఐటీ ఉద్యోగులు, విద్యార్థులు, ఔత్సాహికులు హాజరయ్యారు. యువత తమ వినూత్న ఆలోచనలతో ప్రయోగాలు చేస్తూ, సమాజంలోని సమస్యలకు కొత్త పరిష్కారాలను కనుగొనాలని మంత్రి సూచించారు. ఒక సమస్యకు యువత కనుగొనే పరిష్కారం విప్లవాత్మక మార్పులకు దారితీయగలదని పేర్కొన్నారు. ఈ సందర్భంగా టెన్సెర్గో సంస్థ రూపొందించిన శ్రీధర్‌ బాబు డిజిటల్‌ రూపమైన ‘తెలంగాణ ఏఐ మినిస్టర్‌’ అవతార్‌ను ఆవిష్కరించారు. కృత్రిమ మేధ ఆధారంగా పనిచేసే ఈ అవతార్‌ తెలుగు, ఆంగ్ల భాషల్లో అడిగిన ప్రశ్నలకు సమాధానాలు ఇచ్చింది. సాంకేతికతను ప్రజలతో సమాచార మార్పిడికి, డిజిటల్‌ సేవల అభివృద్ధికి ఎలా ఉపయోగించవచ్చో ఈ ప్రదర్శన చాటిచెప్పింది.