ట్రంప్‌కు జెలెన్‌స్కీ షాక్.. రష్యా చమురు కేంద్రాలపై దాడులు ఆగవు!

రష్యా–ఉక్రెయిన్ యుద్ధం నేపథ్యంలో ఇంధన మౌలిక వసతులపై దాడుల విషయంలో మరోసారి ఉద్రిక్తతలు పెరిగాయి. రష్యా చమురు శుద్ధి కర్మాగారాలపై దాడులను నిలిపివేయాలన్న ప్రతిపాదనను ఉక్రెయిన్ అధ్యక్షుడు వొలోదిమిర్ జెలెన్‌స్కీ వ్యతిరేకించినట్లు కథనాలు వెల్లడించాయి. ఇంధన కేంద్రాలపై పరస్పర దాడులను నిలిపివేయాలనే ఉద్దేశంతో అమెరికా అధ్యక్షుడు డొనాల్డ్ ట్రంప్ ప్రతిపాదించినట్లు చెబుతున్న ‘ఎనర్జీ కాల్పుల విరమణ’ నేపథ్యంలో ఈ పరిణామం చోటుచేసుకుంది. ఉక్రెయిన్ డ్రోన్ దాడుల కారణంగా డీజిల్ ధరలు పెరుగుతున్నాయని ట్రంప్ ఆరోపించినట్లు కూడా కథనం పేర్కొంది.

రష్యా 2022 ఫిబ్రవరిలో ఉక్రెయిన్‌పై పూర్తిస్థాయి దాడిని ప్రారంభించినప్పటి నుంచి ఇరు దేశాలు ఇంధన మౌలిక వసతులను లక్ష్యంగా చేసుకుంటున్నాయి. రష్యా ఉక్రెయిన్ ఇంధన కేంద్రాలపై దాడులు చేస్తుండగా, ఉక్రెయిన్ రష్యాలోని చమురు శుద్ధి కర్మాగారాలు, ఇతర ఇంధన కేంద్రాలపై డ్రోన్ దాడులు కొనసాగిస్తోంది. ఇదిలా ఉండగా, యూరప్ దేశాల నుంచి మరింత రక్షణ సహాయం పొందేందుకు, రష్యాపై ఒత్తిడి పెంచేందుకు జెలెన్‌స్కీ ప్రయత్నిస్తున్నట్లు సమాచారం. ఇంధన కాల్పుల విరమణ, ఇంధన సరఫరాలపై కుదిరినట్లు చెబుతున్న ఒప్పందాలకు సంబంధించిన వివరాలపై మరింత అధికారిక స్పష్టత రావాల్సి ఉంది.