హైదరాబాద్‌లో జొమాటో కస్టమర్‌ కేర్‌ సెంటర్‌ క్లోజ్‌..

ఫుడ్‌ డెలివరీ సంస్థ జొమాటో హైదరాబాద్‌లోని తన కస్టమర్‌ సపోర్ట్‌ కార్యకలాపాలను మూసివేస్తోంది. ఈ నిర్ణయంతో సుమారు 240–250 మంది ఉద్యోగులు ప్రభావితమవుతున్నారు. కస్టమర్‌ సపోర్ట్‌ మోడల్‌ను పునర్వ్యవస్థీకరించడంలో భాగంగానే ఈ నిర్ణయం తీసుకున్నట్లు కంపెనీ తెలిపింది. గత ఆరు నెలల్లో కస్టమర్‌ కేర్‌ పనుల్లో ఎక్కువ భాగాన్ని ప్రత్యేక సేవా సంస్థలకు ఔట్‌సోర్స్‌ చేసినట్లు సమాచారం. ఈ నిర్ణయం ఉద్యోగుల పనితీరుకు సంబంధం లేదని కంపెనీ స్పష్టం చేసింది.

అయితే జొమాటో ఇన్‌హౌస్‌ కస్టమర్‌ సపోర్ట్‌ను పూర్తిగా నిలిపివేయడం లేదు. మిగిలిన కార్యకలాపాలను హర్యానాలోని గురుగ్రామ్‌ హెడ్‌ ఆఫీస్‌లో ఏకీకృతం చేయనుంది. తద్వారా ప్రొడక్ట్‌, టెక్నాలజీ, అనలిటిక్స్‌, బిజినెస్‌ విభాగాలతో కస్టమర్‌ సపోర్ట్‌ టీమ్‌ మరింత సమన్వయంతో పనిచేయనుంది. ఉద్యోగాలు కోల్పోతున్న వారికి ఆగస్టు నెల పూర్తి జీతంతో పాటు కాంట్రాక్ట్‌ నోటీస్‌ పే, ఒకేసారి చెల్లించే ఎక్స్‌గ్రేషియా కలిపి నాలుగు నెలల సెవెరెన్స్‌ ప్యాకేజీ ఇవ్వనున్నట్లు సమాచారం. 2027 మార్చి 31 వరకు మెడికల్‌ ఇన్సూరెన్స్‌, కౌన్సెలింగ్‌ సపోర్ట్‌ కొనసాగించడంతో పాటు కొత్త ఉద్యోగాల కోసం ఔట్‌ప్లేస్‌మెంట్‌ సహాయం కూడా అందించనుంది. AI, ఆటోమేషన్‌, థర్డ్‌ పార్టీ సేవలపై కంపెనీల ఆధారపడటం పెరుగుతున్న నేపథ్యంలో జొమాటో తాజా నిర్ణయం ప్రాధాన్యం సంతరించుకుంది.