దసరా కానుకగా రామాయణం నుంచి డబుల్ ట్రీట్?

దర్శకుడు నితేశ్ తివారీ తెరకెక్కిస్తున్న భారీ పౌరాణిక చిత్రం ‘రామాయణం’ ప్రపంచవ్యాప్తంగా నవంబర్ 5, 2026న థియేటర్లలో విడుదల కానుంది. ఇందులో రణ్‌బీర్ కపూర్ శ్రీరాముడిగా, సాయిపల్లవి సీతగా, యష్ రావణుడిగా నటిస్తున్నారు. నిర్మాతలు నమిత్ మల్హోత్రా, యష్ భారీ స్థాయిలో ఈ చిత్రాన్ని నిర్మిస్తున్నారు. దసరా సందర్భంగా అక్టోబర్ 20న ప్రపంచవ్యాప్తంగా ముందస్తు టికెట్ బుకింగ్‌లు ప్రారంభం కానున్నట్లు సమాచారం. అదే రోజున సినిమా రెండో థియేట్రికల్ ట్రైలర్‌ను విడుదల చేసే అవకాశం ఉందని సినీ వర్గాల్లో ప్రచారం జరుగుతోంది. ఈ ట్రైలర్‌లో రాముడి శక్తితో పాటు రావణుడి భీకరమైన కోణాన్ని కూడా చూపించనున్నట్లు తెలుస్తోంది.

అయితే, రెండో ట్రైలర్ విడుదల తేదీపై చిత్ర నిర్మాణ సంస్థ నుంచి ఇంకా అధికారిక ప్రకటన వెలువడలేదు. ఈ చిత్రంలో సన్నీ డియోల్, వివేక్ ఒబెరాయ్, కాజల్ అగర్వాల్, రకుల్ ప్రీత్ సింగ్, రవి దూబే, అరుణ్ గోవిల్ కీలక పాత్రల్లో కనిపించనున్నారు. ప్రముఖ సంగీత దర్శకుడు ఏఆర్ రెహమాన్, హాలీవుడ్ సంగీత దర్శకుడు హాన్స్ జిమ్మర్ కలిసి ఈ చిత్రానికి నేపథ్య సంగీతం అందిస్తున్నారు.