వరుణ్‌ తేజ్‌ ఖాతాలో మరో సినిమా?

కథానాయకుడు వరుణ్‌ తేజ్‌ ఇటీవల ‘కొరియన్‌ కనకరాజు’ చిత్రంతో ప్రేక్షకుల ముందుకు వచ్చారు. ప్రస్తుతం కాలి గాయం నుంచి కోలుకుంటున్న ఆయన త్వరలోనే ‘బరి’ సినిమా షూటింగ్‌లో పాల్గొననున్నారు. ఈ విరామ సమయంలో వరుణ్‌ కొన్ని కథలు విన్నట్లు తెలుస్తోంది. వాటిలో ఓ సినిమాకు సూత్రప్రాయంగా అంగీకారం తెలిపినట్లు సమాచారం.

దర్శకుడు అట్లీ శిష్యుడు బాలాజీ ఈ చిత్రానికి దర్శకత్వం వహించే అవకాశం ఉందని, తమిళ దర్శకుడు కార్తిక్‌ సుబ్బరాజు నిర్మించనున్నట్లు ప్రచారం జరుగుతోంది. మరోవైపు ‘ఆయ్‌’ ఫేమ్‌ అంజి కూడా వరుణ్‌ తేజ్‌కు ఓ కథ వినిపించినట్లు వార్తలు వస్తున్నాయి. ప్రస్తుతం చేస్తున్న సినిమాను పూర్తి చేసిన తర్వాతే వరుణ్‌ ఈ రెండు ప్రాజెక్టులపై దృష్టి సారించనున్నట్లు తెలుస్తోంది.