‘బ్లడీ రోమియో’.. ఒక వంటవాడి మాఫియా కథ?

సుజిత్ దర్శకత్వంలో నాని హీరోగా నటిస్తున్న ‘బ్లడీ రోమియో’ కథ ఓ చెఫ్ చుట్టూ తిరుగుతుందని సమాచారం. వంటగదిలో ఉల్లిపాయలు కోస్తూ, రుచికరమైన వంటకాలు సిద్ధం చేసే సాధారణ వ్యక్తిలా కనిపించే అతడికి మరో ప్రమాదకరమైన రూపం కూడా ఉంటుంది. అంతర్జాతీయ నేర ప్రపంచంతో సంబంధాలున్న క్రూరమైన గ్యాంగ్‌స్టర్‌గా అతడు రహస్య జీవితం గడుపుతాడని ప్రచారం జరుగుతోంది. వంట చేయడంలో నైపుణ్యం కలిగిన ఈ వ్యక్తి, నేరగాళ్ల స్థావరంలోనూ భోజనం సిద్ధం చేసిన అనంతరం విధ్వంసానికి దిగుతాడనే అంశం కథపై ఆసక్తిని పెంచుతోంది.

భారత్‌లో మొదలయ్యే అంతర్జాతీయ ఆహార మాఫియా నేపథ్యంలో కథ సాగుతుందని తెలుస్తోంది. అనంతరం లండన్‌కు చేరుకునే కథనం, అక్కడి ముఠాల మధ్య ఆధిపత్య పోరు, వ్యవస్థీకృత నేరాలు, అధికారాన్ని చేజిక్కించుకోవాలనే ప్రయత్నాలతో ఉత్కంఠభరితంగా మారుతుందని సమాచారం. సాధారణ వంటగదికి, ప్రమాదకరమైన నేర ప్రపంచానికి మధ్య కథానాయకుడి జీవితం ఎలా సాగుతుందన్నదే ఈ చిత్రంలో ప్రధాన ఆకర్షణగా నిలవనుంది. అయితే కథకు సంబంధించిన పూర్తి వివరాలు అధికారికంగా వెల్లడికావాల్సి ఉంది. విభిన్నమైన నేపథ్యం, హింసాత్మక పరిణామాలతో ఈ చిత్రం ప్రేక్షకులను ఎంతవరకు ఆకట్టుకుంటుందో చూడాలి.