ప్రభాస్ లైనప్‌తో దర్శకులకు పెరుగుతున్న టెన్షన్!

పాన్ ఇండియా స్టార్ ప్రభాస్ ప్రస్తుతం వరుస భారీ చిత్రాలతో అత్యంత బిజీగా ఉన్న హీరోగా కనిపిస్తున్నారు. ఆయన చేతిలో ‘కల్కి 2’, ‘ఫౌజీ’, ‘స్పిరిట్’, ‘సలార్ 2’ వంటి భారీ ప్రాజెక్టులు ఉన్నాయి. ఒక్కో సినిమా వందల కోట్ల భారీ బడ్జెట్‌తో రూపొందుతుండటంతో ఈ చిత్రాలపై అంచనాలు కూడా అదే స్థాయిలో ఉన్నాయి. అయితే ఇంత పెద్ద లైనప్ ఇప్పుడు దర్శకులకు కొత్త తలనొప్పులు తెచ్చిపెడుతున్నట్టు తెలుస్తోంది. ప్రభాస్ ఒకేసారి పలు సినిమాల షూటింగ్‌లను బ్యాలెన్స్ చేయాల్సి రావడంతో కాల్ షీట్ల కేటాయింపు కీలకంగా మారింది. ఒక సినిమా చిత్రీకరణ ఆలస్యమైతే దాని ప్రభావం వెంటనే మరో సినిమాపై పడే పరిస్థితి ఏర్పడుతోంది. దీంతో ప్రభాస్‌తో సినిమాలు ప్రకటించిన దర్శకులు తమ షెడ్యూళ్లను ఆయన అందుబాటులో ఉండే తేదీలకు అనుగుణంగా మార్చుకోవాల్సి వస్తోంది. భారీ ప్రాజెక్టులు కావడంతో చిన్న ఆలస్యం కూడా మొత్తం నిర్మాణ ప్రణాళికను ప్రభావితం చేసే అవకాశం ఉంది.

నాగ్ అశ్విన్ దర్శకత్వంలో తెరకెక్కుతున్న ‘కల్కి 2’ కోసం ప్రభాస్ నుంచి బల్క్ డేట్స్ ఎప్పుడు లభిస్తాయా అని మేకర్స్ ఎదురుచూస్తున్నట్టు సమాచారం. మరోవైపు హను రాఘవపూడి తెరకెక్కిస్తున్న ‘ఫౌజీ’ చిత్రీకరణ సుదీర్ఘంగా సాగుతోంది. అక్టోబర్ వరకు షూటింగ్ కొనసాగించే అవకాశం కనిపిస్తోంది. సందీప్ రెడ్డి వంగా దర్శకత్వంలో రూపొందుతున్న ‘స్పిరిట్’ షూటింగ్ కూడా మధ్యలో విరామాలతో నెమ్మదిగా సాగుతున్నట్టు తెలుస్తోంది. ప్రశాంత్ నీల్ తెరకెక్కించాల్సిన ‘సలార్ 2: శౌర్యాంగ పర్వం’ పరిస్థితి కూడా భిన్నంగా లేదు. ప్రభాస్ ఇతర చిత్రాలతో బిజీగా ఉండటం, ప్రశాంత్ నీల్‌కు ఇతర కమిట్‌మెంట్లు ఉండటంతో ఈ సినిమా ప్రారంభంపై స్పష్టత రావాల్సి ఉంది. గతంలో ‘రాధేశ్యామ్’, ‘ఆదిపురుష్’, ‘సలార్’, ‘రాజా సాబ్’ చిత్రాలను సమాంతరంగా చేయడంతో ఎదురైన ఆలస్యాల మాదిరిగానే ఇప్పుడు కూడా సవాళ్లు కనిపిస్తున్నాయి. మరి ప్రభాస్ ఏ సినిమాను ముందుగా పూర్తి చేస్తారో చూడాలి.