‘జైలర్ 2’ రిలీజ్‌పై సస్పెన్స్.. ఆ తేదీకి సినిమా వస్తుందా?

సూపర్ స్టార్ రజినీకాంత్, దర్శకుడు నెల్సన్ దిలీప్‌కుమార్ కాంబినేషన్‌లో తెరకెక్కుతున్న మోస్ట్ అవైటెడ్ మూవీ ‘జైలర్ 2’పై ఇప్పుడు రిలీజ్ డేట్ విషయంలో ఆసక్తికరమైన చర్చ జరుగుతోంది. అక్టోబర్ 15న ప్రపంచవ్యాప్తంగా గ్రాండ్‌గా విడుదల చేయనున్నట్లు మేకర్స్ ఇప్పటికే ప్రకటించారు. అయితే చెన్నై సినీ వర్గాల్లో వినిపిస్తున్న సమాచారం ప్రకారం, ఈ సినిమా అనుకున్న తేదీకి రావడం కష్టమేననే ప్రచారం మొదలైంది. సన్ పిక్చర్స్ నుంచి ఇప్పటివరకు అధికారిక ప్రకటన రాకపోయినా, అక్టోబర్ 16న మరో సినిమాను రిలీజ్ చేసేందుకు ప్రయత్నాలు జరుగుతున్నట్లు తెలుస్తోంది.

రీ-షూట్స్ కారణంగానే ‘జైలర్ 2’ వాయిదా పడే అవకాశం ఉందనే టాక్ వినిపిస్తోంది. దర్శకుడు నెల్సన్ కొన్ని సన్నివేశాల్లో కీలక మార్పులు చేస్తున్నట్లు సమాచారం. మరోవైపు సినిమా బిజినెస్ డీల్స్ ఇంకా పూర్తికాకపోవడం కూడా చర్చనీయాంశంగా మారింది. ముఖ్యంగా తెలుగు హక్కుల కోసం నిర్మాతలు భారీ మొత్తాన్ని ఆశిస్తున్నట్లు తెలుస్తోంది. రిలీజ్‌కు కేవలం 45 రోజుల సమయం మాత్రమే ఉండటంతో ప్రమోషన్స్, పోస్ట్ ప్రొడక్షన్ పనులను వేగవంతం చేయాల్సిన అవసరం ఉంది. ఇటీవల విడుదలైన పూర్ణ స్పెషల్ సాంగ్‌కు మిక్స్‌డ్ రెస్పాన్స్ రావడం కూడా చర్చకు దారితీసింది. ఈ వాయిదా ప్రచారానికి తెరపడాలంటే సన్ పిక్చర్స్ నుంచి అధికారిక క్లారిటీ రావాల్సి ఉంది.