చిరంజీవి ‘కాకా’లో కబీర్‌ సరికొత్త అవతారం

మెగాస్టార్‌ చిరంజీవి కథానాయకుడిగా నటిస్తున్న తాజా చిత్రం ‘కాకా’ 2027 జనవరి 13న ప్రేక్షకుల ముందుకు రానుంది. బాబీ కొల్లి దర్శకత్వం వహిస్తున్న ఈ సినిమా ప్రస్తుతం హైదరాబాద్‌లో చిత్రీకరణ జరుపుకుంటోంది. సాధారణంగా ప్రతినాయక పాత్రల్లో కనిపించే కబీర్‌ దుహాన్‌ సింగ్‌ ఈ చిత్రంలో సానుకూల పాత్రలో కనిపించనున్నట్లు సమాచారం. ఇందులో ఆయన రహస్య పోలీసు అధికారిగా నటిస్తున్నట్లు ప్రచారం జరుగుతోంది. ఈ పాత్రతో ఆయన తెరపై సరికొత్తగా కనిపించనున్నారు.

ఈ చిత్రంలో అనస్వర రాజన్‌, నివేదా పేతురాజ్‌, అనురాగ్‌ కశ్యప్‌, గెటప్‌ శ్రీను తదితరులు కీలక పాత్రలు పోషిస్తున్నారు. తమన్‌ సంగీతం అందిస్తున్నారు. ‘కాకా’ చిత్రంతో కేవీఎన్‌ ప్రొడక్షన్స్‌ తెలుగు చిత్ర పరిశ్రమలోకి అడుగుపెడుతోంది. విభిన్నమైన పాత్రలో కబీర్‌ కనిపించనున్నారనే వార్తతో ఈ సినిమాపై ప్రేక్షకుల్లో ఆసక్తి నెలకొంది.