ముందుగా పెళ్లి ప్రపోజల్‌ చేసింది రష్మికే.. విజయ్‌ ఆసక్తికర వ్యాఖ్యలు!

టాలీవుడ్‌ స్టార్‌ జంట విజయ్‌ దేవరకొండ, రష్మిక మందన్న తమ ప్రేమకథ, పెళ్లికి సంబంధించిన ఆసక్తికర విషయాలను తాజాగా ‘కాఫీ విత్‌ కరణ్‌’ టాక్‌ షోలో పంచుకున్నట్లు తెలుస్తోంది. కొన్నేళ్లుగా ప్రేమలో ఉన్న ఈ జంట ఈ ఏడాది ఫిబ్రవరిలో పెద్దల సమక్షంలో వివాహ బంధంలోకి అడుగుపెట్టింది. పెళ్లి తర్వాత కలిసి నటించిన ‘రణబాలి’ సినిమా ఇటీవల ప్రేక్షకుల ముందుకు వచ్చింది. ఈ సినిమా ప్రమోషన్లలో భాగంగా ఇద్దరూ వేర్వేరుగా ఇంటర్వ్యూలు ఇచ్చారు. తాజాగా టాక్‌ షోలో తమ ప్రేమ ప్రయాణం గురించి మాట్లాడిన విజయ్‌ దేవరకొండ.. రొమాంటిక్‌ విషయాలను ప్లాన్‌ చేయడంలో తాను అంతగా నైపుణ్యం కలిగిన వ్యక్తిని కాదని చెప్పారు. అయినప్పటికీ, రష్మికకు ప్రత్యేకమైన జ్ఞాపకాన్ని అందించాలనే ఉద్దేశంతో ఇటలీ పర్యటనలో ప్రపోజ్‌ చేయాలని భావించానని, అయితే సరైన ఉంగరం దొరకకపోవడంతో ఆ ప్రయత్నం సాధ్యపడలేదని వెల్లడించారు.

పెళ్లికి ముందు నిర్వహించిన సంగీత్‌ వేడుకలో మాత్రం స్నేహితుల సమక్షంలో మోకాళ్లపై నిలబడి రష్మికకు ప్రపోజ్‌ చేసినట్లు విజయ్‌ తెలిపారు. ఈ సందర్భంగా తమ ఇద్దరిలో ముందుగా పెళ్లి ప్రపోజల్‌ చేసింది రష్మికేనని కూడా వెల్లడించారు. తాను అంగీకారం తెలిపేలోపే ఆమె ఎన్నోసార్లు అడిగిందని విజయ్‌ సరదాగా వ్యాఖ్యానించారు. దీనిపై రష్మిక స్పందిస్తూ, విజయ్‌ను పెళ్లికి ఒప్పించేందుకు దాదాపు ఏడాది పాటు అడుగుతూనే ఉన్నానని నవ్వుతూ చెప్పారు. దీంతో ఇద్దరి మధ్య జరిగిన సరదా సంభాషణ అభిమానులను ఆకట్టుకునేలా మారింది. తమ ప్రేమకథలోని మధురమైన జ్ఞాపకాలను ఈ జంట పంచుకోవడంతో వారి వ్యక్తిగత జీవితంపై మరోసారి ఆసక్తి పెరిగింది.