బాలయ్య సినిమాలో తమిళ స్టార్‌?

నందమూరి నటసింహం బాలకృష్ణ, దర్శకుడు కొరటాల శివ కాంబినేషన్‌లో తెరకెక్కనున్న కొత్త సినిమాపై భారీ అంచనాలు నెలకొన్నాయి. శ్రీలక్ష్మి వెంకటేశ్వర సినిమాస్‌ బ్యానర్‌పై సుధాకర్‌ చెరుకూరి భారీ బడ్జెట్‌తో ఈ చిత్రాన్ని నిర్మిస్తున్నారు. బాలకృష్ణను ఇప్పటివరకు చూడని సరికొత్త మాస్‌ లుక్‌, పవర్‌ఫుల్‌ అవతార్‌లో చూపించేందుకు కొరటాల శివ ప్రత్యేక కథను సిద్ధం చేసినట్లు తెలుస్తోంది. యాక్షన్‌తో పాటు బలమైన కుటుంబ భావోద్వేగాలు, సామాజిక అంశాలను కథలో కీలకంగా మేళవిస్తున్నట్లు సమాచారం.

ఇదిలా ఉండగా, ఈ సినిమాలో ఓ కీలక పాత్ర కోసం తమిళ స్టార్‌ హీరో ఆర్యను ఎంపిక చేసినట్లు టాలీవుడ్‌ వర్గాల్లో ప్రచారం జరుగుతోంది. ఆర్య ఇందులో పవర్‌ఫుల్‌ పోలీస్‌ ఆఫీసర్‌ పాత్రలో కనిపించనున్నారనే టాక్‌ వినిపిస్తోంది. ఈ పాత్ర కథలో కీలక మలుపుకు కారణమవుతుందని, బాలకృష్ణ–ఆర్య మధ్య సన్నివేశాలు సినిమాకు ప్రధాన ఆకర్షణగా నిలుస్తాయని ప్రచారం సాగుతోంది. అయితే ఈ కాంబినేషన్‌పై మేకర్స్‌ నుంచి అధికారిక ప్రకటన రావాల్సి ఉంది.