రాకాలో విల్ స్మిత్?

ఐకాన్ స్టార్ అల్లు అర్జున్ హీరోగా తెరకెక్కుతున్న భారీ చిత్రం ‘రాకా’పై అంచనాలు రోజురోజుకూ పెరుగుతున్నాయి. యంగ్ అండ్ టాలెంటెడ్ దర్శకుడు అట్లీ ఈ అంతర్జాతీయ స్థాయి ప్రాజెక్ట్‌ను తెరకెక్కిస్తున్నారు. రెండు భాగాలుగా రూపొందుతున్న ఈ సినిమాకు సంబంధించిన పనులు శరవేగంగా కొనసాగుతున్నాయి. అయితే ఈ ప్రాజెక్ట్ అల్లు అర్జున్ వద్దకు రాకముందే పలువురు ప్రముఖ హీరోలను సంప్రదించినట్టు గతంలో వార్తలు వచ్చాయి. అదే సమయంలో ప్రముఖ హాలీవుడ్ నటుడు విల్ స్మిత్‌ను కూడా ఈ సినిమాలో భాగం చేయాలని అట్లీ ప్రయత్నిస్తున్నారనే ప్రచారం జరిగింది. అనంతరం ఆ వార్తలు కొంతకాలం తెరమరుగయ్యాయి. ఇప్పుడు మరోసారి అదే అంశం సినీ వర్గాల్లో హాట్ టాపిక్‌గా మారింది. విల్ స్మిత్ ‘రాకా’లో కీలక పాత్రలో కనిపించబోతున్నారనే ప్రచారం సోషల్ మీడియాలో జోరుగా సాగుతోంది.

విల్ స్మిత్ ఈ ప్రాజెక్ట్‌లో చేరబోతున్నారనే వార్త ఇప్పుడు అభిమానుల్లో ఆసక్తిని పెంచుతోంది. అయితే గతంలో కూడా ఇదే తరహా ప్రచారం జరగడంతో తాజా వార్తపై అధికారిక స్పష్టత వచ్చే వరకు వేచి చూడాల్సిందే. ప్రస్తుతం చిత్ర బృందం ఈ విషయంపై ఎలాంటి ప్రకటన చేయలేదు. ఒకవేళ విల్ స్మిత్ నిజంగానే సినిమాలో భాగమైతే ‘రాకా’కు అంతర్జాతీయ స్థాయిలో మరింత క్రేజ్ వచ్చే అవకాశం ఉంది. అల్లు అర్జున్, అట్లీ కాంబినేషన్‌కు హాలీవుడ్ స్టార్ జత అయితే ఈ ప్రాజెక్ట్‌పై అంచనాలు మరింత పెరగడం ఖాయం. మరి ఈ ప్రచారం నిజమా, కేవలం రూమరా అనేది చిత్ర బృందం స్పందిస్తేనే స్పష్టమవుతుంది. అప్పటివరకు అభిమానులు ఆసక్తిగా ఎదురుచూడాల్సిందే.