టైగర్ ష్రాఫ్‌పై కాల్పుల ఘటనలో ట్విస్ట్..

బాలీవుడ్ నటుడు టైగర్ ష్రాఫ్‌పై ముంబయిలో జరిగిన కాల్పుల ఘటనలో కీలక విషయాలు వెలుగులోకి వచ్చినట్లు జాతీయ మీడియా కథనాలు వెల్లడించాయి. పోలీసు వర్గాలను ఉటంకిస్తూ వచ్చిన నివేదికల ప్రకారం, గ్యాంగ్‌స్టర్ లారెన్స్ బిష్ణోయ్ గ్యాంగ్‌కు చెందిన నిందితులు తొలుత నటుడు అమిర్‌ ఖాన్‌ను లక్ష్యంగా చేసుకున్నట్లు సమాచారం. హరియాణాకు చెందిన ఇద్దరు షూటర్లు సెప్టెంబర్ 20న ముంబయికి చేరుకుని దాదాపు నెల రోజుల పాటు ఆయన నివాస ప్రాంతాన్ని పరిశీలించినట్లు దర్యాప్తులో వెల్లడైందని కథనాలు పేర్కొన్నాయి. అమిర్‌ ఖాన్ ఎక్కువగా ఇంట్లోనే ఉండటం లేదా సినిమా షూటింగ్‌లకు వెళ్లడం వల్ల ఆయన కదలికలను గుర్తించడం కష్టమైందని, దీంతో నిందితులు తమ ప్రణాళికను మార్చుకున్నట్లు సమాచారం.

టైగర్ ష్రాఫ్ తరచూ ఆదివారాల్లో ఫుట్‌బాల్ ఆడేందుకు బయటకు రావడాన్ని గమనించిన నిందితులు, ఆయన కదలికలను గుర్తించడం సులభమని భావించి లక్ష్యాన్ని మార్చుకున్నట్లు నివేదికలు తెలిపాయి. మరోవైపు, అమిర్‌ ఖాన్‌కు జులైలో బెదిరింపులు వచ్చినట్లు కూడా వార్తలు వెలువడ్డాయి. ఈ బెదిరింపులకు, తాజా కాల్పుల ఘటనకు ఏమైనా సంబంధం ఉందా అనే కోణంలో పోలీసులు దర్యాప్తు చేస్తున్నట్లు సమాచారం. సల్మాన్ ఖాన్, రణ్‌బీర్ కపూర్ నివాస ప్రాంతాలను కూడా నిందితులు పరిశీలించినట్లు కొన్ని నివేదికలు పేర్కొన్నాయి. అయితే, వీరందరినీ నిర్దిష్టంగా లక్ష్యంగా చేసుకోవాలని ఆదేశాలు వచ్చాయా లేదా అన్నది ఇంకా స్పష్టంగా లేదని పోలీసులు తెలిపినట్లు మరో కథనం వెల్లడించింది.