వేదికపైనే కన్నీళ్లు పెట్టుకున్న నటి ఆనంది.. కారణమిదే!

తెలుగు, తమిళ సినీ పరిశ్రమల్లో నటిగా ప్రత్యేక గుర్తింపు తెచ్చుకున్న ఆనంది ‘గరివిడి లక్ష్మి’ సినిమా ప్రీ రిలీజ్ వేడుకలో భావోద్వేగానికి లోనయ్యారు. అక్టోబర్ 17న సినిమా విడుదల కానున్న నేపథ్యంలో విశాఖపట్నంలో చిత్ర బృందం ఈ కార్యక్రమాన్ని నిర్వహించింది. ఈ సందర్భంగా మాట్లాడిన ఆనంది తన సినీ ప్రయాణం గురించి, పరిశ్రమలో ఎదురయ్యే సవాళ్ల గురించి మనసులోని మాటలను పంచుకున్నారు. సినిమాల్లో ఎన్నో లెక్కలు, రాజకీయాలు ఉంటాయని, కొన్నిసార్లు తాను ఈ రంగానికి సరిపోనేమో అనిపిస్తుందని ఆవేదన వ్యక్తం చేశారు.

అదే సమయంలో ప్రేక్షకులు తనపై చూపిస్తున్న ప్రేమ, ఆదరణ తనకు ఎంతో బలాన్నిస్తున్నాయని ఆనంది తెలిపారు. వారి మద్దతు వల్లే అన్ని సవాళ్లను ఎదుర్కొంటూ ముందుకు సాగుతున్నానని చెబుతూ అభిమానులకు కృతజ్ఞతలు తెలిపారు. తన భావోద్వేగ ప్రసంగంతో అక్కడున్నవారిని ఆకట్టుకున్నారు. ఆనంది ప్రధాన పాత్రలో నటించిన ‘గరివిడి లక్ష్మి’ అక్టోబర్ 17న థియేటర్లలో విడుదల కానుంది. ఈ సినిమా ప్రీ రిలీజ్ వేడుకతో పాటు ఆనంది చేసిన వ్యాఖ్యలు కూడా ప్రస్తుతం చర్చనీయాంశంగా మారాయి.