అల్లు అర్హ ఖాతాలో అరుదైన ప్రపంచ రికార్డు!

అల్లు అర్జున్, స్నేహా రెడ్డి దంపతుల కుమార్తె అల్లు అర్హ కేవలం ఐదేళ్ల వయసులోనే ‘నోబెల్ బుక్ ఆఫ్ వరల్డ్ రికార్డ్స్’లో చోటు సంపాదించినట్లు సమాచారం. చిన్నారులకు చదరంగం ప్రాథమిక అంశాలను పరిచయం చేస్తూ వారికి మార్గనిర్దేశం చేసినందుకు ప్రపంచంలోనే అత్యంత పిన్న వయస్కురాలైన చెస్ ట్రైనర్లలో ఒకరిగా గుర్తింపు పొందింది. ఈ ఘనతతో ఆమె ప్రతిభ మరోసారి వెలుగులోకి వచ్చింది.

ఇప్పటికే ‘శాకుంతలం’ చిత్రంలో బాలనటిగా నటించి ప్రేక్షకుల ప్రశంసలు అందుకున్న అల్లు అర్హ, ఇప్పుడు ప్రపంచ రికార్డుతో మరో అరుదైన గుర్తింపు సొంతం చేసుకుంది. ఈ విజయంతో అల్లు కుటుంబం ఆనందం వ్యక్తం చేస్తుండగా, చిన్నప్పటి నుంచే పిల్లల ఆసక్తులను ప్రోత్సహిస్తున్న అల్లు అర్జున్, స్నేహా రెడ్డి దంపతులపై నెటిజన్లు ప్రశంసలు కురిపిస్తున్నారు.