‘టాక్సిక్’ ఇంగ్లీష్ వెర్షన్‌కు బిగ్ షాక్?

ఇండియన్ సినిమా మార్కెట్ ఇప్పుడు పాన్ వరల్డ్ స్థాయికి విస్తరిస్తోంది. దర్శకుడు రాజమౌళి చూపించిన మార్గంలో మరింత ముందుకు వెళ్లే ప్రయత్నాల్లో భాగంగా ‘టాక్సిక్’ సినిమాను కన్నడతో పాటు ఇంగ్లీష్‌లోనూ తెరకెక్కించారు. శాండిల్ వుడ్ రాకింగ్ స్టార్ యష్ హీరోగా నటించిన ఈ చిత్రాన్ని రెండు భాషల్లో ఒకేసారి రూపొందించారు. అంతేకాకుండా హాలీవుడ్ ప్రేక్షకులను లక్ష్యంగా చేసుకుని ప్రముఖ డిస్ట్రిబ్యూషన్ సంస్థ లయన్స్ గేట్ ద్వారా అక్కడ కూడా విడుదల చేశారు. థియేటర్లలో విడుదలైన తర్వాత ఈ సినిమా హాలీవుడ్‌లో ఎలాంటి ప్రభావం చూపిందనే విషయంపై పెద్దగా సమాచారం బయటకు రాలేదు. ప్రపంచవ్యాప్తంగా మొదటి రోజే 150 కోట్ల వసూళ్లు సాధించినట్లు మేకర్స్ ప్రకటించారు. అయితే ప్రధానంగా హిందీ, తెలుగు, కన్నడ మార్కెట్ల నుంచే మంచి స్పందన వచ్చినట్లు తెలుస్తోంది.

ఇంగ్లీష్‌లో నేరుగా రూపొందించిన ‘టాక్సిక్’కు హాలీవుడ్ మార్కెట్‌లో మాత్రం ఆశించిన స్థాయిలో ఆదరణ దక్కలేదనే ప్రచారం ఇప్పుడు వినిపిస్తోంది. ముఖ్యంగా ఇంగ్లీష్ వెర్షన్‌కు 1 మిలియన్ డాలర్ గ్రాస్ కూడా రాలేదని సినీ వర్గాల్లో చర్చ జరుగుతోంది. దీంతో హాలీవుడ్ కోసం మేకర్స్ చేసిన ప్రయత్నం ఆశించిన ఫలితాన్ని అందుకోలేకపోయిందనే అభిప్రాయాలు వ్యక్తమవుతున్నాయి. అయితే ఇండియన్ సినిమా నుంచి ఇలాంటి ప్రయోగం చేయడం మాత్రం ప్రత్యేకమైన విషయంగానే చెప్పాలి. థియేటర్లలో పరిస్థితి ఎలా ఉన్నప్పటికీ, ఓటీటీ విడుదల తర్వాత ‘టాక్సిక్’కు అంతర్జాతీయ ప్రేక్షకుల్లో మరింత రీచ్ వస్తుందా అనే ఆసక్తి నెలకొంది. ముఖ్యంగా యష్ క్రేజ్ ఓటీటీ మార్కెట్‌లో సినిమాకు ఎంతవరకు ఉపయోగపడుతుందో చూడాలి.