పవన్‌ పుట్టినరోజున అన్నయ్య స్పెషల్ పోస్ట్

పవన్ కళ్యాణ్ పుట్టినరోజు సందర్భంగా మెగాస్టార్ చిరంజీవి ఆయనకు ప్రత్యేకంగా శుభాకాంక్షలు తెలిపారు. పిఠాపురం ప్రజలు తనను గెలిపించినప్పటికీ, పవన్‌ కళ్యాణ్ ఒక ప్రజాప్రతినిధిగా కాకుండా కుటుంబ సభ్యుడిలా వారికి అండగా నిలుస్తున్నారని చిరంజీవి పేర్కొన్నారు. తమ్ముడి నిబద్ధత, బాధ్యత, ప్రజలకు మంచి చేయాలనే తపన చిన్నప్పటి నుంచే తనకు తెలుసని, పవన్‌ సంకల్ప సాధకుడని ప్రశంసించారు.

ఉప ముఖ్యమంత్రిగా బాధ్యతలు చేపట్టిన తర్వాత గ్రామాల అభివృద్ధి, గిరిజన ప్రాంతాల అభ్యున్నతి, పర్యావరణ పరిరక్షణ, ప్రజల మౌలిక అవసరాల కోసం పవన్‌ అంకితభావంతో పనిచేస్తున్నారని చిరంజీవి అన్నారు. ఎన్నో ఏళ్లుగా పరిష్కారం కాని సమస్యలకు శాశ్వత పరిష్కారాలు చూపుతూ మారుమూల ప్రాంతాల అభివృద్ధికి కృషి చేస్తున్నారని తెలిపారు. ప్రజల కష్టాలను తన కష్టాలుగా భావించే పవన్‌ ప్రతి అడుగులోనూ విజయం సాధించాలని ఆకాంక్షించారు.

మరోవైపు పవన్‌ కళ్యాణ్కు సినీ ప్రముఖులు కూడా సోషల్ మీడియా వేదికగా పుట్టినరోజు శుభాకాంక్షలు తెలిపారు. పవర్‌స్టార్‌కు అల్లు అర్జున్‌ శుభాకాంక్షలు చెప్పగా, దర్శకుడు హరీశ్‌ శంకర్‌ ‘‘అప్పటికీ.. ఇప్పటికీ.. ఎప్పటికీ.. మిమ్మల్ని ప్రేమిస్తూనే ఉంటాం’’ అని పేర్కొన్నారు. దర్శకులు గోపిచంద్‌ మలినేని, అనిల్‌ రావిపూడి కూడా పవన్‌కు శుభాకాంక్షలు తెలుపుతూ ఆయన ప్రయాణం ఎన్నో తరాలకు స్ఫూర్తిదాయకమని కొనియాడారు.