సెన్సార్ బోర్డులో భారీ డేటా లీక్.. 500కుపైగా సినిమాల రికార్డులు, స్క్రిప్టులు బహిర్గతం!

భారత కేంద్ర చలనచిత్ర ధ్రువీకరణ మండలి (సీబీఎఫ్‌సీ)కు సంబంధించిన భారీ డేటా లీక్‌ ఘటనపై జాతీయ మీడియా కథనాలు వెలువడ్డాయి. ఈ ఘటనలో 500కుపైగా సినిమాలకు సంబంధించిన ధ్రువీకరణ రికార్డులు బహిర్గతమైనట్లు సమాచారం. థియేటర్లలో విడుదల చేసేందుకు ధ్రువీకరణ పొందే క్రమంలో నిర్మాతలు సమర్పించిన స్క్రిప్టులు, కట్ ఆర్డర్లు, ఇతర కీలక పత్రాలు కూడా ఈ జాబితాలో ఉన్నట్లు కథనాలు పేర్కొన్నాయి. సీబీఎఫ్‌సీ తన ధ్రువీకరణ ప్రక్రియను డిజిటలైజ్ చేయడానికి సుమారు పదేళ్ల క్రితం ప్రారంభించిన ఈ-సినీప్రమాణ్ (eCinepramaan) ఆన్‌లైన్ పోర్టల్‌కు ఈ పత్రాలు సంబంధించినవిగా తెలుస్తోంది. సినిమా ధ్రువీకరణ కోసం నిర్మాతలు ఈ పోర్టల్ ద్వారా అవసరమైన పత్రాలను సమర్పిస్తారు.

ఆన్‌లైన్ సమాచారాన్ని భద్రపరిచే లాభాపేక్షలేని డిజిటల్ లైబ్రరీ అయిన ఇంటర్నెట్ ఆర్కైవ్ ద్వారా ఈ పత్రాలు డౌన్‌లోడ్ చేసుకునేందుకు అందుబాటులోకి వచ్చినట్లు సమాచారం. ఘటన వెలుగులోకి వచ్చిన తర్వాత సంబంధిత సమాచారాన్ని తొలగించామని, సైబర్ అధికారులకు ఫిర్యాదు చేశామని ఇంటర్నెట్ ఆర్కైవ్ తెలిపింది. మరోవైపు, ఈ ఘటనపై దర్యాప్తు చేపట్టడంతో పాటు ఈ-సినీప్రమాణ్ పోర్టల్‌కు భద్రతా ఆడిట్ నిర్వహిస్తున్నట్లు సీబీఎఫ్‌సీ వెల్లడించింది. అనధికారిక యాక్సెస్‌కు సంబంధించిన ఆరోపణలను సమీక్షించామని, ఇప్పటివరకు ఇతరులు ఆ పత్రాలను యాక్సెస్ చేసినట్లు లేదా ఏదైనా చిత్రనిర్మాత ఖాతా హ్యాక్ అయినట్లు ఆధారాలు లభించలేదని పేర్కొంది. దర్యాప్తు కొనసాగుతున్న నేపథ్యంలో పూర్తి వివరాలు అనంతరం వెల్లడయ్యే అవకాశం ఉంది.