చిరంజీవి ‘కాకా’ మేజర్ షెడ్యూల్‌కు ముహూర్తం ఫిక్స్!

మెగాస్టార్ చిరంజీవి, బ్లాక్‌బస్టర్ దర్శకుడు బాబీ కొల్లి కలయికలో తెరకెక్కుతున్న భారీ చిత్రం ‘కాకా’. గతంలో ‘మెగా158’గా ప్రచారంలో ఉన్న ఈ ప్రాజెక్ట్‌పై ‘వాల్తేరు వీరయ్య’ తర్వాత వీరిద్దరి కాంబినేషన్ కావడంతో భారీ అంచనాలు నెలకొన్నాయి. తాజాగా చిత్ర బృందం తదుపరి కీలక షూటింగ్ షెడ్యూల్‌ను ప్రకటించింది. సెప్టెంబర్ 7 నుంచి హైదరాబాద్‌లో ఈ సుదీర్ఘ షెడ్యూల్ ప్రారంభం కానుంది. కథకు కీలకమైన పలు సన్నివేశాలను ఈ షెడ్యూల్‌లో చిత్రీకరించనున్నారు.

ఇప్పటికే పొల్లాచ్చి, హైదరాబాద్‌లో సినిమా షూటింగ్‌లోని ముఖ్యమైన భాగాలను పూర్తి చేశారు. మిగిలిన చిత్రీకరణను కూడా వేగంగా పూర్తి చేసేందుకు మేకర్స్ ప్లాన్ చేస్తున్నారు. అనస్వర రాజన్, నివేదా పేతురాజ్ కీలక పాత్రల్లో నటిస్తుండగా, సునీల్, గెటప్ శ్రీను ఇతర ముఖ్య పాత్రల్లో కనిపించనున్నారు. కేవీఎన్ ప్రొడక్షన్స్ బ్యానర్‌పై వెంకట్ కె. నారాయణ నిర్మిస్తున్న ఈ చిత్రానికి ఎస్. తమన్ సంగీతం అందిస్తున్నారు. విజయ్ కార్తీక్ కన్నన్ సినిమాటోగ్రఫీ, ఆంటోని రూబెన్ ఎడిటింగ్, అవినాష్ కొల్లా ప్రొడక్షన్ డిజైన్ బాధ్యతలు నిర్వహిస్తున్నారు. ఈ చిత్రాన్ని 2027 సంక్రాంతి సందర్భంగా జనవరి 13న ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ ఇప్పటికే ప్రకటించారు.