రవితేజ పని తీరు చూసి డైరెక్టర్ షాక్!

మాస్‌ మహారాజ్‌ రవితేజకు ఉన్న ఎనర్జీ, టైమింగ్‌, స్క్రీన్‌ ప్రెజెన్స్‌ గురించి ప్రత్యేకంగా చెప్పాల్సిన అవసరం లేదు. అయితే ఆయన సన్నివేశాల్లో నటించే విధానం గురించి దర్శకుడు శివ నిర్వాణ ఆసక్తికర విషయాలను వెల్లడించారు. సాధారణంగా నటులు ఓ సన్నివేశం చేసేటప్పుడు దానికి ముందు, తర్వాత జరిగే పరిణామాలు, పాత్ర ప్రయాణం వంటి అంశాలను దృష్టిలో పెట్టుకుంటారని తెలిపారు. కానీ రవితేజ మాత్రం ఒక సీన్‌లో తాను ఏం చేయాలో మాత్రమే చెబితే చాలని కోరుకుంటారని శివ నిర్వాణ చెప్పారు. మొదట్లో ఈ విధానం తనకు కాస్త భిన్నంగా అనిపించినా.. రవితేజ నటనను చూసిన తర్వాత ఆయన వర్కింగ్‌ స్టైల్‌ అర్థమైందని పేర్కొన్నారు.

దర్శకుడిపై పూర్తి నమ్మకం ఏర్పడిన తర్వాత రవితేజ ఆయన సూచనలను పూర్తిగా అనుసరిస్తారని శివ నిర్వాణ తెలిపారు. కథ మొత్తం గురించి ఆలోచిస్తూ ఒత్తిడికి గురికాకుండా, ఆ క్షణంలో పాత్రకు అవసరమైన అంశంపైనే దృష్టి పెట్టడం రవితేజ ప్రత్యేకత అని చెప్పారు. దర్శకుడు ఏం కావాలో స్పష్టంగా చెబితే.. దాన్ని తనదైన ఎనర్జీ, టైమింగ్‌తో తెరపై ఆవిష్కరించడం రవితేజ బలమని శివ నిర్వాణ అభిప్రాయపడ్డారు. దర్శకుడి ఆలోచనను అర్థం చేసుకుని, తన నటనతో సన్నివేశానికి ప్రాణం పోయడం ఆయనలోని ప్రత్యేక లక్షణమని ప్రశంసించారు.