డూమ్స్‌డే రికార్డుల వేట మొదలు?

మార్వెల్ సినిమాటిక్ యూనివర్స్ నుంచి రానున్న అత్యంత ప్రతిష్టాత్మక చిత్రం ‘అవెంజర్స్: డూమ్స్‌డే’ విడుదలకు ముందే బాక్సాఫీస్ వద్ద సంచలన వాతావరణం సృష్టిస్తోంది. డిసెంబర్ 18న ప్రపంచవ్యాప్తంగా ప్రేక్షకుల ముందుకు రానున్న ఈ చిత్రానికి అడ్వాన్స్ బుకింగ్స్ ప్రారంభమైన కొద్ది గంటల్లోనే అద్భుత స్పందన లభించింది. ట్రైలర్ విడుదల అనంతరం ప్రారంభించిన టికెట్ విక్రయాల్లో కేవలం 12 గంటల్లోనే $10.5 మిలియన్ల విలువైన టికెట్లు అమ్ముడవడం ట్రేడ్ వర్గాలను ఆశ్చర్యానికి గురిచేసింది. ప్రస్తుతం డిస్నీ అందుబాటులోకి తీసుకొచ్చిన ‘ఇన్ఫినిటీ విజన్’ ప్రీమియం లార్జ్ స్క్రీన్ ఫార్మాట్‌లో మాత్రమే బుకింగ్స్ ప్రారంభించినప్పటికీ ఈ స్థాయి వసూళ్లు రావడం విశేషంగా మారింది. అమెరికాలో మొత్తం స్క్రీన్లలో కేవలం 10 శాతం థియేటర్లలోనే టికెట్లు అందుబాటులో ఉన్నప్పటికీ ప్రేక్షకుల స్పందన అసాధారణంగా కనిపిస్తోంది.

ఈ సినిమాపై భారీ అంచనాలకు ప్రధాన కారణంగా రాబర్ట్ డౌనీ జూనియర్ రీ ఎంట్రీ నిలిచింది. ఎన్నో ఏళ్ల పాటు ‘ఐరన్ మ్యాన్’గా అభిమానులను అలరించిన ఆయన ఈసారి ‘డాక్టర్ డూమ్’ పాత్రలో కనిపించనున్నారు. ‘అవెంజర్స్: ఇన్ఫినిటీ వార్’, ‘అవెంజర్స్: ఎండ్‌గేమ్’ చిత్రాలతో సంచలన విజయాలు అందించిన రుస్సో బ్రదర్స్ ఈ చిత్రాన్ని తెరకెక్కిస్తుండటంతో అంచనాలు మరింత పెరిగాయి. క్రిస్ ఎవాన్స్, క్రిస్ హేమ్స్‌వర్త్, పెడ్రో పాస్కల్, ఆంథోనీ మాకీ, పాల్ రుడ్ వంటి ప్రముఖ నటీనటులు కీలక పాత్రల్లో కనిపించనున్నారు. ప్రచార చిత్రాలకే విశేష స్పందన రావడంతో విడుదల తర్వాత ఈ చిత్రం మరిన్ని ప్రపంచ రికార్డులను తన ఖాతాలో వేసుకుంటుందనే అంచనాలు వ్యక్తమవుతున్నాయి.