క్రిస్టోఫర్ నోలన్ ‘ది ఒడిస్సీ’ రికార్డును బద్దలుకొట్టిన ‘డ్యూన్ 3’

యూకేలోని అతిపెద్ద సినిమా తెరగా పేరొందిన బీఎఫ్‌ఐ ఐమాక్స్‌లో ‘డ్యూన్: పార్ట్ త్రీ’ అడ్వాన్స్ బుకింగ్స్‌లో సరికొత్త రికార్డు సృష్టించింది. బుకింగ్స్ ప్రారంభమైన మొదటి 24 గంటల్లోనే ఈ సినిమా 33 వేల టికెట్లు విక్రయించి, సుమారు 8.8 లక్షల పౌండ్ల స్థూల ఆదాయాన్ని సాధించింది. ఈ వేదికపై తొలి రోజు అడ్వాన్స్ బుకింగ్స్‌లో నమోదైన అత్యధిక వసూళ్లు ఇవే. ఇంతకుముందు క్రిస్టోఫర్ నోలన్ తెరకెక్కించిన బ్లాక్‌బస్టర్ ‘ది ఒడిస్సీ’ ఈ రికార్డును సొంతం చేసుకుంది. ఆ చిత్రం తొలి 24 గంటల్లో సుమారు 7.5 లక్షల పౌండ్ల అడ్వాన్స్ బుకింగ్స్ వసూళ్లు సాధించింది. ఇప్పుడు ‘డ్యూన్: పార్ట్ త్రీ’ ఆ రికార్డును అధిగమించింది.

డెనిస్ విల్లెన్యూవ్ దర్శకత్వం వహిస్తున్న ‘డ్యూన్: పార్ట్ త్రీ’లో పాల్ అట్రెయిడ్స్‌గా తిమోతీ షాలమే నటిస్తున్నాడు. తన పాలన పర్యవసానాలను ఎదుర్కొంటూ, తిరిగి వచ్చే పాత మిత్రులు, కొత్త భయంకరమైన శత్రువులు, వెన్నుపోట్ల మధ్య పాల్ చేసే పోరాటం ఈ కథలో ప్రధానాంశంగా ఉండనుంది. ఈ చిత్రంలో జెండయా, జేసన్ మోమోవా, రాబర్ట్ ప్యాటిన్సన్, ఫ్లోరెన్స్ ప్యూ కీలక పాత్రల్లో కనిపించనున్నారు. అడ్వాన్స్ బుకింగ్స్‌లో ఈ స్థాయి స్పందన రావడంతో సినిమాపై అంచనాలు మరింత పెరిగాయి. ప్రపంచవ్యాప్తంగా విడుదలైన తర్వాత ఈ ముందస్తు ఆదరణ బాక్సాఫీస్ విజయంగా మారుతుందా అనేది ఆసక్తికరంగా మారింది.