‘జిడిఎన్’లో మాధవన్ పవర్‌ఫుల్ లుక్ వైరల్

భారతీయ శాస్త్రవేత్త, ఆవిష్కర్త జి.డి. నాయుడు జీవితాన్ని ఆధారంగా చేసుకుని తెరకెక్కుతున్న ‘జిడిఎన్’ సినిమాపై ప్రేక్షకుల్లో ఆసక్తి రోజురోజుకీ పెరుగుతోంది. హీరో మాధవన్ ప్రధాన పాత్రలో నటిస్తున్న ఈ బయోపిక్‌కు కృష్ణకుమార్ రామకుమార్ దర్శకత్వం వహిస్తున్నారు. వర్గీస్ మూలన్ పిక్చర్స్, ట్రైకలర్ ఫిలిమ్స్ సంస్థలు సంయుక్తంగా నిర్మిస్తున్న ఈ చిత్రం భారీ స్థాయిలో తెరకెక్కుతోంది. తాజాగా విడుదలైన పోస్టర్‌లో జి.డి. నాయుడు పాత్రలో మాధవన్ పవర్‌ఫుల్ లుక్‌లో కనిపించగా, దుషారా విజయన్ సంప్రదాయ చీరకట్టులో ఆకట్టుకుంది.

‘బ్రిటిష్ వారికి భయం కలిగించాడు... తన దేశస్థులచే మరచిపోయాడు’ అనే క్యాప్షన్ సినిమాపై మరింత ఆసక్తి పెంచుతోంది. భారతదేశానికి చెందిన గొప్ప మేధావి కథను ఈ తరం ప్రేక్షకులకు పరిచయం చేయాలనే లక్ష్యంతో ఈ చిత్రాన్ని రూపొందిస్తున్నట్లు తెలుస్తోంది. ఈ సినిమాలో జయరామ్, యోగిబాబు, ప్రియమణి కీలక పాత్రల్లో నటిస్తున్నారు. పాన్ ఇండియా స్థాయిలో తెరకెక్కుతున్న ఈ చిత్రం జూలై 17న తెలుగు, తమిళ, కన్నడ, మలయాళ, హిందీ భాషల్లో విడుదల కానుంది.