తెలుగు మార్కెట్‌లో ‘జైలర్ 2’పై హై టెన్షన్

సూపర్ స్టార్ రజనీకాంత్ ప్రస్తుతం నెల్సన్ దిలీప్ కుమార్ దర్శకత్వంలో తెరకెక్కుతున్న ‘జైలర్ 2’ చిత్రంలో నటిస్తున్నారు. ఈ సినిమాను అక్టోబర్ 16న విడుదల చేయనున్నట్లు ఇప్పటికే అధికారికంగా ప్రకటించారు. అయితే విడుదల తేదీ దగ్గరపడుతున్నప్పటికీ తెలుగు రాష్ట్రాల థియేట్రికల్ హక్కుల వ్యాపారం ఇంకా పూర్తికాలేదని సినీ వర్గాల సమాచారం.

మొదటి భాగం ‘జైలర్’ తెలుగు రాష్ట్రాల్లో అంచనాలకు మించి విజయం సాధించి డిస్ట్రిబ్యూటర్లకు భారీ లాభాలు తెచ్చిపెట్టింది. ఈ నేపథ్యంలో ‘జైలర్ 2’పై కూడా భారీ అంచనాలు నెలకొన్నాయి. దీనితో నిర్మాణ సంస్థ సన్ పిక్చర్స్ తెలుగు హక్కులకు ఎక్కువ ధరను నిర్ణయించిందని సమాచారం. అధిక ధర కారణంగా పలువురు డిస్ట్రిబ్యూటర్లు వెనకడుగు వేస్తుండటంతో ఒప్పందం ఆలస్యమవుతోంది. ఈ చిత్ర హక్కులను చివరకు ఎవరు దక్కించుకుంటారన్నది ఆసక్తికరంగా మారింది.