మంచు కుటుంబంలో పుట్టకపోతే ఇంకెంత ఎదిగేదాన్నో: లక్ష్మి

టాలీవుడ్ నటి మంచు లక్ష్మి తాజాగా ఓ కార్యక్రమంలో చేసిన వ్యాఖ్యలు చర్చనీయాంశంగా మారాయి. తన తండ్రి మోహన్ బాబు, సోదరులు విష్ణు, మనోజ్ చిత్ర పరిశ్రమలో ఉన్నప్పటికీ, కుటుంబ పేరు తన ఎదుగుదలకు ఎప్పుడూ ప్రయోజనం కలిగించలేదని, కొన్ని సందర్భాల్లో అది తన కెరీర్‌కు అడ్డంకిగా కూడా మారిందని ఆమె అన్నారు. పితృస్వామ్య వాతావరణంలో పెరిగిన తాను, నేటి గుర్తింపు కోసం ప్రతి అడుగులోనూ పోరాడాల్సి వచ్చిందని పేర్కొన్నారు. ఒకవేళ మంచు కుటుంబంలో జన్మించి ఉండకపోతే తన సినీ కెరీర్ మరింత ఉన్నత స్థాయికి చేరి ఉండేదని అభిప్రాయపడ్డారు.

కొత్తగా ఏదైనా చేయాలని ప్రయత్నించిన ప్రతిసారీ ఇంట్లో ప్రశ్నలు ఎదురయ్యేవని లక్ష్మి తెలిపారు. అలాగే చిత్ర పరిశ్రమలో ‘మంచు’ అనే ఇంటిపేరును తానే ముందుగా ఉపయోగించడం ప్రారంభించానని చెప్పారు. తన కంటే ముందే విష్ణు, మనోజ్ నటులుగా పరిచయమైనప్పటికీ, వారు మొదట్లో ఎం. విష్ణువర్ధన్ బాబు, ఎం. మనోజ్ కుమార్ పేర్లతోనే ఉన్నారని గుర్తుచేశారు. తాను తన తాతగారి పేరైన ‘మంచు’ను ఉపయోగించడం ప్రారంభించిన తర్వాతే కుటుంబంలోని ఇతరులు కూడా ఆ ఇంటిపేరును విస్తృతంగా వాడటం మొదలుపెట్టారని వివరించారు.